A Xunta lanza axudas para rehabilitar vivendas destinadas a traballadoras no rural
O presidente da Xunta, Alfonso Rueda, anunciou a aprobación da primeira orde de axudas destinada á rehabilitación de vivendas en concellos de menos de 20.000 habitantes co obxectivo de destinalas a persoas traballadoras e favorecer así a fixación de poboación no rural.
A convocatoria, cun orzamento de 1,5 millóns de euros para o período 2026-2027, permitirá a empresas, particulares e concellos reformar inmobles que deberán destinarse durante un mínimo de dez anos ao alugueiro ou cesión a persoas traballadoras do entorno.
Cubrir vacantes e atraer talento
Segundo explicou Rueda, esta iniciativa busca dar resposta tanto á falta de man de obra en sectores estratéxicos como ás dificultades de acceso á vivenda, especialmente no rural.
Neste sentido, valoraranse especialmente as solicitudes vinculadas a persoas beneficiarias de programas como Retorna Cualifica Emprego ou as bolsas BEME, co obxectivo de atraer talento exterior cando sexa necesario.
Dúas liñas de axuda
A orde contempla dúas liñas diferenciadas:
750.000 euros para empresas e persoas físicas que rehabiliten vivendas para os seus traballadores
750.000 euros para concellos que colaboren con empresas neste proceso
Do total, 600.000 euros corresponden a 2026 e 900.000 a 2027.
As axudas oscilarán entre 30.000 e 75.000 euros por proxecto e poderán destinarse a obras de rehabilitación, ampliación, accesibilidade, eficiencia enerxética ou mesmo a gastos técnicos previos.
Criterios de valoración
Para a concesión das axudas teranse en conta factores como:
A vinculación a sectores estratéxicos (automoción, naval, TIC, agroalimentario, coidados, entre outros)
A proximidade da vivenda ao centro de traballo (máximo 15 km)
A evolución demográfica do municipio
A sustentabilidade das actuacións
Tamén se valorará que as vivendas estean situadas en áreas Rexurbe.
Impulso ao rural
A Xunta sinala que esta medida busca contribuír á vertebración territorial, facilitar o acceso á vivenda e reforzar o desenvolvemento económico, permitindo que as persoas traballadoras poidan establecerse no rural con garantías.