A Xunta publica o novo catálogo Danza Galicia con 137 espectáculos de 55 compañías
A Xunta de Galicia vén de publicar a terceira edición do catálogo dixital Danza Galicia, unha ferramenta destinada a promover a produción coreográfica galega e facilitar a súa difusión e contratación tanto dentro como fóra da comunidade.
A publicación, impulsada pola Axencia Galega das Industrias Culturais a través do Centro Coreográfico Galego, reúne un total de 137 espectáculos de 55 compañías e artistas profesionais, ofrecendo unha ampla panorámica do momento creativo actual do sector.
O catálogo está dispoñible en formato dixital, en galego e castelán, e está pensado como unha ferramenta útil para programadores de teatros, auditorios, salas, circuítos e festivais, así como para o público xeral interesado na danza.
A nova edición reflicte a diversidade estética, xeracional e de formatos da danza galega, con propostas que abranguen desde a danza contemporánea ata a urbana, pasando pola danza de raíz, inclusiva ou proxectos que dialogan con outras disciplinas como o teatro, a música en directo ou o circo.
Ademais, inclúe espectáculos de distintos formatos, tanto pezas longas como curtas, así como propostas familiares e para público adulto, o que reforza o seu valor como ferramenta de programación.
O catálogo será presentado o vindeiro 16 de abril no marco do festival Dansa València, un dos principais encontros profesionais do sector na Península.
Con esta iniciativa, a Xunta continúa apostando pola internacionalización e distribución da danza galega, facilitando o contacto directo entre compañías e programadores e abrindo novas oportunidades de exhibición.