A Xunta reforza a formación do Servizo de Prevención e Defensa contra Incendios Forestais no CILL Toén
A Consellería do Medio Rural ampliará a formación continua do persoal do Servizo de Prevención e Defensa contra Incendios Forestais (SPIF) durante o segundo trimestre de 2026, no que se prevé a realización de ata 14 cursos, cun total de 40 edicións e a participación de máis de mil profesionais.
A conselleira do Medio Rural, María José Gómez, visitou recentemente o Centro Integral de Loita contra o Lume (CILL) de Toén, onde se están a desenvolver actualmente dúas das accións formativas incluídas nesta programación: unha dirixida a bombeiros forestais e outra para directores técnicos de extinción. Na visita estivo acompañada polo director xeral de Defensa do Monte, Manuel Francisco.
Gómez destacou a relevancia da formación continua deste persoal, que cualificou como clave para mellorar a resposta fronte aos incendios forestais, e sinalou que esta área constitúe “unha prioridade para o Goberno galego”.
A programación formativa deste trimestre incorporou ademais dous novos cursos que se imparten no propio CILL. Un deles céntrase na mellora da eficiencia operativa dos bombeiros forestais, combinando formación en liña e unha xornada práctica presencial, con contidos como índices de risco, tipoloxía de combustibles, actuacións na interface urbano-forestal ou o comportamento extremo do lume.
O segundo curso está orientado á actualización de procedementos para directores técnicos de extinción, co obxectivo de reforzar coñecementos en planificación, análise da extinción, seguridade, comunicacións e coordinación operativa.
Segundo explicou a Consellería, esta oferta forma parte do Plan de Formación do persoal do SPIF, integrado á súa vez no Plan de prevención e defensa contra os incendios forestais de Galicia (Pladiga 2026). A programación inclúe tamén contidos sobre investigación de lumes, uso de maquinaria, ferramentas de satélite, xestión emocional en emerxencias, coordinación de medios aéreos ou operacións avanzadas de extinción.
A Xunta lembra que durante o ano 2025 se realizaron 25 cursos, distribuídos en arredor de 250 edicións, cun total de case 5.900 participantes, o que reflicte a continuidade e alcance desta formación especializada no ámbito da loita contra o lume.