A Xunta rexistra 6.000 solicitudes do Bono Concilia Familia nas primeiras cinco horas do prazo
A Xunta de Galicia rexistrou ata as 14,00 horas desta tarde 6.000 solicitudes do Bono Concilia Familia, cuxo prazo abriu esta mañá ás 9,00 horas. A apertura realizouse igual que o pasado ano, o primeiro día de inicio de curso escolar, coincidindo coa finalización dos campamentos e actividades de conciliación do verán.
A alta demanda de solicitudes rexistrada nas primeiras cinco horas de apertura do prazo constata a boa acollida desta medida pioneira do Goberno galego para facilitar ás familias a compaxinación da vida persoal e laboral nos períodos non lectivos. A Xunta inviste 2,6 millóns de euros a esta orde de axudas económicas directas que axuda a sufragar os custos dos servizos de atención e coidado aos nenos de entre 4 e 13 anos.
A través do Bono Concilia Familia as unidades familiares poden recibir ata 500 euros para sufragar os custos dun servizo de coidado no domicilio, ou ben ata 200 euros por fillo naqueles casos nos que se acuda a un servizo especializado como as ludotecas, campamentos ou actividades de conciliación.
O Goberno galego recorda que as persoas interesadas en contar con esta axuda poderán solicitalo ata o vindeiro día 9 de outubro ás 14,00 horas a través da Sede Electrónica da Xunta de Galicia.