A Xunta somete a información pública a planta de vehículos eléctricos de SAIC en Ferrol
A Xunta de Galicia vén de someter a información pública o proxecto e o estudo de impacto ambiental do complexo industrial para a produción e distribución de vehículos eléctricos e híbridos que a compañía chinesa SAIC Motor Corporation Limited prevé construír no porto exterior de Ferrol. A iniciativa, declarada Proxecto Industrial Estratéxico (PIE), constitúe a primeira fase da implantación do fabricante asiático en Galicia e contempla un investimento próximo aos 197 millóns de euros, ademais doutra planta nas Pontes.
O anuncio, publicado este venres no Diario Oficial de Galicia (DOG), abre un prazo de 30 días hábiles para que persoas e entidades interesadas poidan consultar a documentación e presentar alegacións antes da autorización administrativa definitiva.
O proxecto desenvolverase nunha superficie superior aos 100.500 metros cadrados no porto exterior ferrolán, onde se construirá unha planta destinada á ensamblaxe, control de calidade, probas e distribución de vehículos eléctricos e híbridos. As instalacións incluirán un edificio principal de produción, oficinas, almacéns, un circuíto de probas, zonas de almacenamento para vehículos rematados e diferentes infraestruturas auxiliares. Nunha segunda fase prevese ampliar a capacidade loxística e de almacenamento.
Segundo a documentación presentada, a factoría terá capacidade para producir ata 120.000 vehículos ao ano. A previsión é que a iniciativa xere arredor de 1.000 postos de traballo directos en Ferrol, dos que 540 estarán ligados á actividade produtiva e 460 ás operacións loxísticas. Ademais, estímase que o impacto total do proxecto alcance os 2.000 empregos en Galicia ao sumar a actividade indirecta vinculada á automoción e á loxística.
A implantación de SAIC non se limitará a Ferrol. O plan industrial contempla tamén o desenvolvemento dun polo auxiliar nas Pontes, onde poderían instalarse empresas provedoras e actividades relacionadas coa fabricación de compoñentes para automoción. As previsións iniciais apuntan á creación de máis de 300 empregos adicionais, condicionados ás futuras decisións de investimento das compañías auxiliares que se incorporen ao proxecto.
Desde a Xunta destacan que esta iniciativa supón un paso relevante para a reindustrialización das comarcas de Ferrol e As Pontes, reforzando a capacidade produtiva galega nun sector estratéxico como o da automoción e favorecendo a creación dunha rede de provedores e servizos asociados arredor da nova fábrica. O Consello da Xunta declarou o proxecto como Proxecto Industrial Estratéxico o pasado 1 de xuño ao considerar que terá un importante efecto tractor sobre a economía e o emprego na zona.