A Xunta trae por primeira vez a Galicia á cantante americana Anastacia, con todas as entradas esgotadas no Auditorio Mar de Vigo
A delegada territorial da Xunta en Vigo, Ana Ortiz, presentou este venres no Auditorio Mar de Vigo o concerto que ofrecerá o vindeiro domingo (19:00 horas) a artista internacional Anastacia, na que será a súa primeira actuación en Galicia.
O concerto enmárcase dentro do Gozo Festival, unha das grandes citas musicais que apoia o Goberno galego a través de ‘Concertos do Xacobeo’, a marca coa que pretende unificar a programación de música, espectáculos e ocio para convertela nun atractivo turístico.
Na presentación, xunto a Carolina Martín, responsable de comunicación da produtora viguesa Sweet Nocturna, a representante autonómica explicou que todas as entradas están esgotadas, aínda que aínda é posible que se liberen algunhas localidades por axustes de produción.
Un evento de referencia para a proxección de Galicia
Ana Ortiz destacou que a Xunta apoia iniciativas capaces de atraer a distintos tipos de público e que sirvan como motor turístico, reforzando a imaxe de Galicia tanto a nivel nacional como internacional.
A icónica artista Anastacia (Chicago, 1968) chega a Vigo coa súa esperada xira #NTK25, no que será o seu primeiro concerto en Galicia, despois de actuar en Barcelona e Madrid. Nesta xira, a cantante celebra o 25 aniversario do seu álbum debut ‘Not That Kind’, que a catapultou á fama internacional no ano 2000 con éxitos como ‘I’m Outta Love’.
Con máis de 30 millóns de discos vendidos en todo o mundo, Anastacia colleitou grandes éxitos ao longo da súa carreira, con sete álbums de estudo e colaboracións con artistas de renome como Luciano Pavarotti, Elton John, Michael Jackson e Eros Ramazzotti.