Abe Rábade presenta en Lugo o seu novo disco, "Nova Botánica", o 8 de novembro
Abe Rábade presentará en Lugo o seu novo traballo discográfico, "Nova Botánica", o domingo 8 de novembro no auditorio Fuxan os Ventos, como parte da programación do Festival de Jazz de Lugo. O álbum, que verá a luz a finais deste mes, é o décimo sétimo da carreira do pianista e compositor de Santiago de Compostela.
O proxecto continúa o universo sonoro iniciado con "Botánica", publicado en 2022, e explora a vexetación autóctona galega a través da paisaxe e da súa dimensión ética e reivindicativa. A proposta afástase dunha visión estritamente folclórica para combinar a música tradicional galega co jazz e a música de cámara.
O concerto contará cun amplo elenco de músicos: Perico Sambeat, aos saxos alto e soprano; Davide Salvado e Antía Muíño, nas voces e na percusión tradicional; Pablo Martín Caminero, ao contrabaixo; Naíma Acuña, á batería; Cibrán Seixo, ao violín; e Jimena Andión, ao violonchelo.
A dimensión audiovisual tamén terá un papel destacado no espectáculo. O videoartista Xacobe Meléndrez Fassbender será o encargado de crear proxeccións inmersivas para acompañar a interpretación de cada especie vexetal.
Tras a estrea galega en Lugo, Abe Rábade presentará o disco a nivel estatal o luns 9 de novembro na Sala Villanos de Madrid, dentro do Festival Internacional de Jazz da capital.