Abel Losada encabezará a candidatura do PSOE ao Congreso por Pontevedra nas eleccións do 29 de novembro
O subdelegado do Goberno en Pontevedra, Abel Losada, foi proposto para encabezar a candidatura do PSOE ao Congreso dos Deputados pola provincia nas próximas eleccións do 29 de novembro, tras recibir o visto e prace do comité provincial. A proposta queda agora pendente da súa ratificación definitiva pola dirección federal do partido.
A lista ao Congreso estará encabezada por Losada, de Vigo, e continuará, por esta orde, con Margarita Adrio, de Pontevedra; Manuel Pazos, de Marín; Tania García, de Vilagarcía; Ángel Rivas, de Vigo; Digna Rivas, de Redondela, e David Alonso, do Porriño.
Pola súa banda, Carmela Silva Rego, tamén de Vigo, repetirá á fronte da candidatura ao Senado pola provincia de Pontevedra. A lista complétana José Cacabelos Rico, do Grove, e Olga Alonso Suárez, de Vigo.
A executiva e o comité provincial celebráronse este mércores pola tarde baixo a presidencia da vicesecretaria xeral provincial, Paula Fernández, ante a ausencia de David Regades por motivos familiares. Nos comicios de 2023, a candidatura socialista ao Congreso por Pontevedra estivera encabezada polo propio Regades, actual secretario xeral do PSOE provincial.
As candidaturas aprobadas polos comités provinciais serán remitidas agora á dirección galega do partido para a emisión do seu informe. Posteriormente, as listas serán analizadas o venres pola Comisión Federal de Listas, antes da súa aprobación definitiva polo Comité Federal do PSOE, convocado para o sábado 17 de outubro.