Abel Losada pon fin ao seu cargo como subdelegado do Goberno en Pontevedra
Abel Losada despediuse hoxe do seu cargo como subdelegado do Goberno en Pontevedra cunha comparecencia ante os medios de comunicación na que revisou os case tres anos á fronte da institución e expresou o seu agradecemento ás persoas, administracións, medios de comunicación e entidades coas que colaborou durante esta etapa.
Losada explicou que o seu cesamento, con efectos desde hoxe, 20 de outubro, e a solicitude de reincorporación ao seu posto de traballo na Universidade de Vigo responden ao cumprimento das disposicións da Lei Orgánica do Réxime Electoral Xeral (LOREG) diante da súa incorporación a unha candidatura como cabeza de lista para as Eleccións Xerais do próximo 29 de novembro.
O subdelegado reivindicou o traballo diario das Forzas e Corpos de Seguridade do Estado, das Forzas Armadas, do Exército e a Armada e do persoal do centro penitenciario da Lama. Neste sentido, trasladou unha mensaxe de confianza á cidadanía: «Vivimos nunha das provincias máis seguras de España e estamos moi ben protexidos; hoxe sei directamente que estamos en moi boas mans».
Losada estendeu o seu agradecemento aos “61 alcaldes e alcaldesas da provincia”, con independencia da súa adscrición política, cos que destacou que mantivo unha relación de diálogo, contacto fluído e respecto institucional, sempre orientada ao interese xeral. “As loitas partidistas teñen sempre un perdedor, que é a cidadanía”, afirmou.
Balance de case tres anos de xestión
No balance da súa etapa, Losada puxo en valor a coordinación e a resposta dos servizos públicos ante situacións extraordinarias, como o apagamento eléctrico, así como o desenvolvemento con normalidade das numerosas manifestacións celebradas na provincia. Gabou tamén o compromiso dos axentes da Garda Civil, Policía Nacional e do Exército desta provincia durante a DANA de Valencia.
O subdelegado destacou especialmente o traballo desenvolvido na “protección das vítimas da violencia machista” e defendeu a importancia do sistema VioGén, que cualificou como imprescindible, a pesar de que a veces se critica con frivolidade. “Sen VioGén seriamos un país mellor”. Ademais fixo un recordo das vítimas da violencia machista en toda España nos 34 meses que estivo á fronte da Subdelegación. “Celebramos máis de 120 minutos de silencio; hai xente que di que estes minutos non valen de nada, pero a min parecéronme dúas horas da vida moi ben empregadas”.
Recalcou que cesa coa satisfacción de ter contribuído ao recomezo das obras do nó dos Bombeiros en Pontevedra e tamén coa emoción de ver como “uns mozos e outros non tan mozos están aí acampados reivindicando pacificamente o país que queren”.
Losada concluíu a súa intervención expresando o seu desexo de que España continúe progresando e de que ese progreso chegue a tódolos habitantes e a tódolos territorios. “Só é progreso cando progresamos todos”, citou.