Abraham Cupeiro fará latexar a memoria da Catedral de Mondoñedo co espectáculo 'O latexo das catedrais'
A Catedral de Mondoñedo converterase o domingo 18 de outubro no escenario de 'O latexo das catedrais', un espectáculo creado expresamente polo sarriao Abraham Cupeiro para este templo e no que música, imaxe e patrimonio se combinan para reconstruír e reimaxinar a súa memoria sonora.
A proposta contará con dous pases, ás 17.00 e ás 19.30 horas, e as entradas para ambas as sesións esgotáronse en apenas uns días despois de saír á venda no mes de maio.
A expectación arredor do espectáculo tamén se trasladou ás redes sociais. Os vídeos promocionais gravados por Cupeiro no interior da Catedral coas súas coleccións de instrumentos antigos superaron xa os dous millóns de reproducións. O último deles, publicado o pasado 28 de setembro, roza o millón e medio de visualizacións e recibiu comentarios desde diferentes puntos do mundo.
Entre as reaccións están as da cantante e compositora británica Annie Lennox, que comentou unha das publicacións cun "Glorious sound" ("Son glorioso"), e a do director de cine estadounidense Spike Lee, que escribiu noutra delas: "I have beautiful music on repeat. I will go to bed at peace" ("Teño música preciosa soando en bucle. Irei durmir en paz").
"O latexo das catedrais" foi concibido especificamente para a Catedral de Mondoñedo, polo que o propio edificio, os seus espazos e a súa acústica forman parte da creación. A proposta busca ofrecer ao público un percorrido pola memoria do templo a través do son e da imaxe.
"No corazón de Mondoñedo, ao amparo de 870 anos de celebracións ininterrompidas das San Lucas, este concerto reimaxina a memoria sonora da súa Catedral, para viaxar aos seus recunchos máis evocadores a través do son e a imaxe", explica o propio Abraham Cupeiro.
O músico, compositor, investigador e multiinstrumentista galego estará acompañado nesta ocasión por Davide Salvado e Matthew Ward, ás voces; Alba Barreiro, ao arpa; Manuel Lorenzo, ao violonchelo; e Sabela Caamaño, ao acordeón e ao órgano da Catedral.
A presenza do órgano do propio templo será un dos elementos sonoros integrados no espectáculo, que se desenvolverá no marco das San Lucas, unha celebración que este ano conmemora 870 anos de historia ininterrompida.
A proposta de Cupeiro establece así un diálogo entre o patrimonio de Mondoñedo, a súa memoria sonora e a creación musical contemporánea, nun espectáculo deseñado para ser vivido no interior da propia Catedral.