Alfombristas expertos de Galicia crearon en Madrid unha alfombra monumental
O Grupo CIDAE Galicia participou en Madrid na elaboración dunha alfombra monumental de 750 metros cadrados situada fronte ao Museo do Prado, unha iniciativa que reivindica o valor universal das tradicións vivas e a importancia do seu recoñecemento como Patrimonio Cultural Inmaterial.
A representación galega contou coa participación de membros das agrupacións de As Pontes, Bueu, Miño e Ortigueira, que se sumaron a esta creación colectiva promovida pola Coordinadora Internacional de Entidades de Alfombristas de Arte Efémera (CIDAE), con motivo do Día Internacional do Patrimonio Cultural Inmaterial, proclamado pola UNESCO.
A iniciativa reuniu 80 alfombristas de dez agrupacións nunha obra que converte a arte efémera nunha expresión de identidade cultural, cooperación e intercambio entre comunidades.
Un deseño que une culturas e tradicións
A obra, deseñada polo arquitecto Manuel Alonso, representa a riqueza das tradicións dos cinco países que impulsan a candidatura internacional presentada ante a UNESCO baixo o título A tradición das alfombras florais e composicións festivas con materiais naturais. A súa avaliación está prevista para decembro de 2026.
Flores, follas, sementes, serraduras, areas e cunchas das costas galegas combináronse para dar forma a unha composición de grandes dimensións que pon de manifesto como os materiais naturais, os coñecementos transmitidos de xeración en xeración e o traballo colectivo contribúen a manter vivo o patrimonio cultural.
Para o Grupo CIDAE Galicia, formar parte desta iniciativa supón levar a tradición alfombreira galega a un escenario de proxección internacional e contribuír á defensa dun patrimonio que pertence ás comunidades que o conservan e transmiten.
A participación galega reafirma así o compromiso coa difusión desta manifestación cultural e co recoñecemento do traballo das persoas e colectivos que manteñen viva a tradición das alfombras florais.
As alfombras desaparecen, pero o seu legado permanece. Esta é a mensaxe dunha iniciativa que reivindica a cultura como espazo de encontro, diálogo e convivencia entre os pobos.
A programación completouse con obradoiros de alfombrismo no Museo do Traxe de Madrid, que permitiron achegar tamén esta manifestación cultural ao público e dar a coñecer as técnicas e os coñecementos asociados a esta tradición.