Alice Kellen pecha en Pontevedra a terceira edición do encontro Pontevedra Literaria
O encontro Pontevedra Literaria Xuventude e Artes pechou este venres a súa terceira edición cunha conversa coa escritora Alice Kellen, unha das autoras máis populares da literatura romántica contemporánea en lingua española. A cita, celebrada no salón de plenos do Pazo provincial, volveu reunir numeroso público e rexistrou un novo cheo.
O presidente da Deputación de Pontevedra, Luis López, destacou a boa acollida e o prestixio dos autores que participaron nesta edición, así como o compromiso da institución coa promoción cultural. Durante a súa intervención, explicou que a Deputación busca canalizar a actividade que xorde das asociacións, editoriais, librarías, clubs de lectura e da propia mocidade para converterse nun espazo de referencia para a cultura na provincia.
"Na Deputación canalizamos toda a efervescencia cultural que emana das asociacións, das editoriais, das librarías, dos clubs de lectura ou da mocidade, que cada vez consume e produce máis cultura, para converternos na gran Casa da Cultura da provincia", sinalou López.
A última xornada do encontro tivo como protagonista a Alice Kellen, que mantivo unha conversa coa xornalista Bibiana Villaverde sobre a súa obra e traxectoria, pero tamén sobre a situación actual da literatura, a chegada de novos autores e a relación da mocidade coa lectura.
O acto contou ademais coa actuación musical da pianista Andrea García e rematou cunha quenda de preguntas na que o público puido participar directamente coa escritora. A resposta dos asistentes volveu ser destacada, despois do cheo rexistrado tamén na xornada anterior, protagonizada polo escritor Marcos Giralt.
Na súa intervención, o presidente provincial puxo o foco no papel da cultura dentro da identidade da provincia. "Vivimos nunha provincia que é unha referencia en calidade de vida. Non só pola nosa riqueza natural, patrimonial ou gastronómica, senón porque tamén coidamos e difundimos a cultura", afirmou.
López subliñou que o compromiso da Deputación coa cultura abrangue diferentes iniciativas, máis alá do propio Pontevedra Literaria. Neste sentido, referiuse ao Museo de Pontevedra e á súa colección de autores como Castelao ou Valle-Inclán, aos Premios de Xuventude, que buscan impulsar a creatividade literaria entre a mocidade, e á Bienal de Arte, presentada pola institución como a máis antiga de España.
O presidente provincial aproveitou tamén para dar a benvida a Alice Kellen e reivindicar a relación da provincia coa creación artística e literaria, describindo Pontevedra como "un lugar de conto, un lugar de cine, un lugar de libro... pero, sobre todo, un lugar para desfrutar".