Ana Ortiz participa no lazo humano celebrado en Vigo polo Día Internacional do Cancro Infantil
A delegada territorial da Xunta de Galicia en Vigo, Ana Ortiz, participou este sábado no lazo humano dourado organizado na cidade con motivo do Día Internacional do Cancro Infantil. A acción foi promovida pola Asociación de Cancro Infantil e Xuvenil de Galicia (Asanog) e El Corte Inglés, co obxectivo de visibilizar a loita dos nenos e nenas que enfrontan esta enfermidade.
“Este lazo dourado que formastes hoxe é a imaxe da sensibilidade que Vigo ten cara a eses nenos e esas familias que se enfrontan a un momento tan duro e complicado”, sinalou Ana Ortiz ao finalizar o evento.
O acto, celebrado na Gran Vía de Vigo, contou coa participación de empregados dos grandes almacéns, membros de Asanog e decenas de cidadáns que quixeron sumarse á iniciativa.
O lazo dourado simboliza o cancro infantil, comparando a fortaleza e resistencia dos nenos coa do ouro, un metal precioso e indestrutible.