As estatuas do Mestre Mateo permanecerán de forma definitiva no Museo do Pobo Galego
As estatuas do Mestre Mateo recuperadas polo Concello de Santiago tras un longo proceso xudicial permanecerán de forma definitiva no Museo do Pobo Galego. Así o anunciou este venres a alcaldesa, Goretti Sanmartín, durante o balance do curso político, no que destacou que a decisión foi adoptada tras un proceso de reflexión no que participaron persoas expertas, institucións e organizacións, ademais da celebración dunhas xornadas abertas.
Segundo explicou a rexedora, a elección do Museo do Pobo Galego responde á vontade de garantir unha interpretación das esculturas que combine o seu valor histórico e artístico coa memoria do espolio sufrido e do proceso que permitiu a súa recuperación. Sanmartín definiu este espazo, de titularidade municipal, como aquel que “todo o mundo entende como o museo nacional de Galicia”.
A alcaldesa aproveitou a comparecencia para facer balance dun curso político que cualificou de “obxectivos conseguidos”, asegurando que o Goberno municipal remata esta etapa “con moitos deberes feitos”.
Entre os principais avances destacou a declaración de Santiago como zona de mercado residencial tensionado, aprobada esta semana polo Ministerio de Vivenda e que terá unha vixencia de tres anos. Sanmartín defendeu esta medida como unha ferramenta prioritaria para actuar sobre o mercado da vivenda e conter o incremento dos prezos do alugueiro, ao tempo que lembrou que o Concello xa aprobou un plan de medidas correctoras para o período 2026-2029.
Neste ámbito, anunciou tamén a colaboración co Consorcio de Santiago para adquirir e rehabilitar edificios residenciais situados na Cidade Histórica. O organismo asumirá a redacción dos proxectos e a execución das obras dos inmobles que adquira o Concello, cun investimento inicial de tres millóns de euros destinado a ampliar o parque público de vivenda en alugueiro e recuperar edificios actualmente baleiros.
Outro dos fitos salientados foi a posta en funcionamento do Centro Loxístico de Distribución de Mercadorías, xa entregado a Mercagalicia tras un investimento de 5,8 millóns de euros financiado con fondos Next Generation. O centro iniciará agora a súa actividade cunha empresa operadora de loxística e, segundo destacou a alcaldesa, situará Compostela como unha referencia neste tipo de proxectos vinculados ás zonas de baixas emisións.
Sanmartín tamén puxo en valor a recente constitución do Foro de Turismo Sustentable, un órgano de participación que desenvolverá as funcións previstas na normativa autonómica sobre o imposto das estadías turísticas e que pretende converterse nun espazo permanente de diálogo para avanzar cara a un modelo turístico máis sustentable e de maior calidade.
No ámbito das comunicacións, a rexedora destacou o reforzo da conectividade internacional do aeroporto Rosalía de Castro coa apertura dunha nova base de Wizz Air a partir do 1 de febreiro e coa incorporación de novas rutas directas con Roma e Varsovia.
Por último, subliñou a adxudicación do novo contrato do transporte urbano, que permitirá renovar o servizo, incorporar unha nova identidade visual e mellorar a información ofrecida ás persoas usuarias.