Emprego

A manifestación reuniu profesionais do sector chegadas de distintos puntos de Galicia, que reclamaron cambios estruturais

As traballadoras do Servizo de Axuda no Fogar (SAF) volveron saír este mércores ás rúas do Porriño para reclamar condicións laborais dignas e maiores garantías de seguridade cando se cumpre un ano do asasinato de Teresa, a empregada do servizo que perdeu a vida mentres realizaba o seu traballo nun domicilio particular. A mobilización, convocada pola CIG, serviu para denunciar que a Xunta continúa sen asumir o protocolo de prevención e actuación fronte á violencia laboral, ao tempo que CCOO insistiu na necesidade de aplicar de maneira efectiva este documento para evitar que unha situación semellante volva repetirse.

A manifestación reuniu profesionais do sector chegadas de distintos puntos de Galicia, que reclamaron cambios estruturais nun servizo que consideran marcado pola precariedade e pola falta de protección. Desde a CIG lembraron que a morte de Teresa puxo de manifesto os riscos aos que se enfrontan diariamente as traballadoras do SAF, que en numerosas ocasións xa advertiran de situacións de violencia e inseguridade nos domicilios nos que prestan atención.

A responsábel de Muller da CIG de Vigo, Ester Mariño, asegurou que o asasinato da compañeira "non foi un accidente", senón a consecuencia dunha realidade que as profesionais levaban tempo denunciando. Segundo explicou, a mobilización desenvolvida durante este último ano permitiu impulsar a elaboración do primeiro Protocolo para a prevención e actuación ante situacións de violencia laboral no SAF, así como dun documento de compromiso que foi subscrito por organizacións sindicais, patronais, a FEGAMP, a Delegación do Goberno e o Colexio Oficial de Traballo Social.

Con todo, a central sindical criticou que a Consellería de Política Social rexeitase asinar ese compromiso, unha decisión que consideran determinante para garantir que o protocolo conte co respaldo económico e normativo necesario para a súa aplicación efectiva. O secretario de Organización da CIG-Servizos, Pedro Pérez, cualificou esta postura de "hipocrisía", ao entender que a Xunta realiza un discurso público de apoio ao sector pero non adopta as medidas necesarias para garantir a seguridade das traballadoras.

A CIG sostén que o principal problema radica no modelo de xestión do Servizo de Axuda no Fogar, baseado na prestación privada dun servizo público esencial. Neste sentido, advertiu de que, mentres a Administración autonómica non asuma un papel máis activo, será moi difícil introducir cambios que convertan a protección das profesionais nunha prioridade real.

Outro dos aspectos que centrou as reivindicacións foi a negociación do convenio colectivo galego do SAF, que permanece sen actualizar desde o ano 2012. A organización sindical considera necesario modificar as condicións laborais para que as traballadoras que teñan que abandonar un domicilio por motivos de seguridade non sufran consecuencias económicas nin vexan reducida a súa xornada ou o seu contrato. Ademais, reclamou á Xunta a creación dun sistema público galego de atención ás persoas que garanta tanto a protección das profesionais como unha atención de calidade ás persoas usuarias.

Ao remate da manifestación, diante da Casa do Concello do Porriño, as traballadoras leron un manifesto no que expresaron o seu cansazo ante "as promesas que non se cumpren" e reclamaron que a súa seguridade deixe de quedar relegada. Tamén esixiron que a Xunta rectifique e asuma as responsabilidades que lle corresponden na implantación do protocolo de prevención, insistindo en que non queren que outra compañeira teña que traballar con medo nin que a continuidade do servizo prevaleza sobre a vida das profesionais.

O acto concluíu coa lectura dun texto colectivo das traballadoras do SAF do Porriño e cunha emotiva solta de globos en lembranza de Teresa, convertida xa nun símbolo da loita pola dignificación do sector.

Pola súa banda, CCOO do Hábitat de Galicia reafirmou o seu compromiso coa seguridade e coa dignidade laboral das traballadoras do Servizo de Axuda no Fogar. O sindicato destacou que a aprobación do protocolo representa un avance histórico na prevención da violencia laboral externa, pero advertiu de que este só terá utilidade se se aplica con todas as garantías e cos recursos necesarios. A organización sindical lembrou que "traballar coidando das demais persoas nunca pode significar traballar con medo" e asegurou que continuará vixiando para que todas as medidas de protección se cumpran, ao tempo que reivindicou a memoria de Teresa como "un símbolo de loita" e reclamou que unha traxedia coma a súa non volva repetirse nunca máis.