Política

Diéguez avanzou que o seu voto particular será favorable a concorrer ás eleccións, ao considerar que Ourense precisa unha alternativa política propia, con propostas concretas e autonomía

Avante Ourense decidirá en novembro se se presenta ás eleccións municipais de 2027. O coordinador da organización, Francisco Diéguez, anunciou a convocatoria dunha Asemblea Xeral na que se adoptará unha decisión democrática sobre a participación nos comicios, ante a falta dunha candidatura de esquerdas confirmada no municipio.

Diéguez avanzou que o seu voto particular será favorable a concorrer ás eleccións, ao considerar que Ourense precisa unha alternativa política propia, con propostas concretas e autonomía. «Non podemos quedar á espera de que outras organizacións resolvan as súas diferenzas», afirmou, aínda que lembrou que a decisión definitiva corresponderá á Asemblea Xeral.

Na súa análise da situación política estatal, autonómica e municipal, o coordinador de Avante Ourense cualificou de decepcionante a ruptura das negociacións entre Podemos e Frente Amplio. Ao seu xuízo, os egos, as desconfianzas e as diferenzas internas volven impedir un acordo que considera prioritario, especialmente nun contexto no que a ultradereita ten posibilidades de chegar ao Goberno. Diéguez defendeu que a cidadanía espera responsabilidade e capacidade para alcanzar acordos, en lugar dunha sucesión de rupturas.

No ámbito autonómico, a organización cuestionou o discurso da Xunta sobre o incremento dos orzamentos das consellerías e criticou unha política fiscal que, segundo Diéguez, beneficia especialmente as rendas máis altas e as persoas con maior patrimonio, mentres os servizos públicos continúan afrontando importantes dificultades.

O coordinador sinalou que o aumento dos orzamentos debe traducirse en melloras reais para a cidadanía. Neste sentido, reclamou máis persoal sanitario e unha redución das listas de espera, así como recursos suficientes para que a educación poida atender adecuadamente o alumnado. Tamén defendeu unha fiscalidade progresiva como instrumento fundamental para financiar uns servizos públicos dignos e accesibles para toda a poboación.

En relación coa política municipal, Diéguez cualificou de vergoñenta a polémica sobre o bono comercio de 2023, despois de que o alcalde, Gonzalo Pérez Jácome, recoñecese no pleno do pasado 16 de outubro que enganara a oposición e vinculase a medida aos seus intereses electorais.

Para o responsable de Avante Ourense, os cartos públicos non poden utilizarse como ferramenta electoral. Ademais, criticou que PP, PSOE e BNG manifestasen agora a súa sorpresa ou alegasen non decatarse de que podían estar sendo utilizados. Diéguez sostivo que a oposición debe fiscalizar a acción do Goberno durante todo o mandato e non limitarse a reaccionar cando xorde unha polémica.

Ante a ausencia dunha candidatura de esquerdas confirmada para as municipais de 2027, Avante Ourense considera necesario decidir o seu futuro electoral nas próximas semanas. A Asemblea Xeral prevista para novembro determinará se a organización concorre aos comicios.

A formación reafirmou a súa vontade de continuar traballando nun proxecto político propio, centrado nos problemas reais da veciñanza e comprometido coa transparencia, a defensa dos servizos públicos e a rexeneración democrática.