Barreiros acolle un Túnel do Viño para analizar o presente e o futuro dos tintos galegos
Barreiros acollerá unha xornada dedicada á viticultura galega que combinará formación e degustación de viños, cunha atención especial á situación e ás perspectivas de futuro dos tintos do país. A actividade desenvolverase nas escolas unitarias situadas xunto ao Concello, con sesións pola mañá e pola tarde.
A programación comezará ás 11:00 horas cunha intervención de Miguel Anxo Besada, sumiller e propietario da Taberna A Curva, en Portonovo. A súa exposición abordará a evolución dos viños tintos galegos, a situación actual do sector e os retos aos que se enfronta para garantir a súa continuidade.
Xa pola tarde, a partir das 17:30 horas, Martiño Santos conducirá o Túnel do Viño, unha cata na que se presentará unha selección de viños da provincia de Lugo. Entre as referencias participantes figuran elaboracións de adegas da IXP Terras do Navia e de diferentes produtores da Ribeira Sacra.
A actividade está organizada pola Federación Rural Galega, a Asociación Galega de Viticultura, o Concello de Barreiros e a Vicepresidencia da Deputación de Lugo. A proposta permitirá achegarse á diversidade vitivinícola da provincia e coñecer distintas elaboracións nunha xornada que une divulgación e experiencia práctica.