Besteiro acusa a Rueda de asumir o discurso da ultradereita sobre inmigración
O secretario xeral do PSdeG, José Ramón Gómez Besteiro, criticou a postura do presidente da Xunta, Alfonso Rueda, en relación co proceso de regularización de persoas migrantes, ao considerar que “abraza o discurso da ultradereita” ao “criminalizar a inmigración”.
Besteiro realizou estas declaracións coincidindo coa apertura do prazo para solicitar a regularización presencial, lembrando que máis de 10.000 persoas en Galicia estaban á espera desta medida. “Xa viven e traballan aquí, pero sen contrato, sen dereitos e sen cotizar”, sinalou.
O líder socialista reprochou ao Partido Popular a súa actitude ante o decreto, asegurando que respondeu “bloqueando” a súa aplicación. Neste sentido, advertiu de que varias comunidades gobernadas polos populares xa anunciaron recursos contra a norma e que a Xunta non descarta sumarse a esta vía.
Ademais, criticou que o Goberno galego non asistise á recente Conferencia Sectorial de Infancia e que recorrera traslados de menores non acompañados, ao considerar que estas decisións responden a unha mesma lóxica política.
Besteiro defendeu que a regularización é unha cuestión de “xustiza”, xa que permite garantir dereitos a persoas que xa forman parte da sociedade. Tamén destacou o seu impacto económico, ao permitir que miles de traballadores pasen “de traballar en negro a cotizar”, contribuíndo así á recadación e ao sistema de pensións.
Neste contexto, subliñou a importancia da inmigración para Galicia, que cualificou como a comunidade “máis avellentada de España”. Segundo indicou, o 43 % do emprego creado desde a última reforma laboral corresponde a persoas de orixe estranxeira, que xa representan máis do 14 % das afiliacións á Seguridade Social.
O secretario xeral do PSdeG lembrou tamén que desde 1986 se levaron a cabo seis procesos de regularización en España, impulsados por gobernos de distinto signo político, incluídos os do Partido Popular.
Finalmente, instou a Rueda a apoiar o proceso e a “defender os dereitos dos máis vulnerables e as necesidades de Galicia”, ao tempo que cuestionou a falta de alternativas por parte do Executivo autonómico.