Besteiro acusa a Rueda de atrasar a transferencia da AP-9 con "subterfuxios"
O secretario xeral do PSdeG, José Ramón Gómez Besteiro, acusou ao Goberno de Alfonso Rueda de intentar atrasar a transferencia da AP-9 mediante a ameaza dun recurso de inconstitucionalidade contra a lei aprobada no Congreso. "O PP de Galicia non quere a transferencia da AP-9 e debería dicilo abertamente", afirmou Besteiro, que considera que a Xunta está recorrendo a un "subterfuxio" para gañar tempo e demorar a aplicación da lei.
O líder socialista explicou que a convocatoria dunha Comisión Bilateral entre o Estado e a Xunta responde ao procedemento previo previsto no artigo 33.2 da Lei Orgánica do Tribunal Constitucional cando unha das partes anuncia a súa intención de presentar un recurso de inconstitucionalidade. "Agora xa sabemos o dato que faltaba. A Comisión Bilateral non se pide para negociar a transferencia, senón porque a Xunta pretende cuestionar a lei que a fai posible", sinalou.
Besteiro lembrou que o órgano no que corresponde negociar as condicións concretas dunha transferencia é a Comisión Mixta de Transferencias. "Se a Xunta quere recibir a AP-9, que sente nesa comisión, negocie e defenda as condicións que considere. O que non ten sentido é buscar outra vía para retrasar a aplicación dunha lei xa aprobada", afirmou.
Ao seu xuízo, a actuación do Executivo galego deixa clara a posición política do PP: "Non queren a transferencia. Entre que se reúne a Comisión Bilateral, se hai acordo ou non e se finalmente presentan o recurso, van gañando tempo".
O día do patriotismo de pulseriña
Preguntado pola ausencia de Alfonso Rueda no Consello da Xunta para participar en Madrid nun acto relacionado coa situación de Ceuta, Besteiro cualificou a decisión como "fondamente equivocada".
"Hoxe parece que toca o día do patriotismo de pulseriña. Imos todos a Madrid a seguir confrontando, en vez de facer o que hai que facer: colaborar con Ceuta e contribuír á reubicación dos menores migrantes non acompañados que necesitan da solidariedade do conxunto das comunidades autónomas", afirmou.
Besteiro acusou o Partido Popular de utilizar a cuestión migratoria para alimentar a confrontación e de asumir cada vez máis os marcos políticos de Vox.
"Sempre que se lle pide responsabilidade e altura, o PP responde amplificando a confrontación en lugar de axudar a resolver os problemas", sinalou. Lembrou, ademais, que o propio presidente de Ceuta reclamara días atrás a colaboración do resto de España para aliviar a presión sobre a cidade autónoma e facilitar a acollida dos menores.
O secretario xeral do PSdeG defendeu que a resposta á situación migratoria debe facerse "con coordinación, lealdade institucional, respecto á legalidade e respecto aos dereitos humanos", atendendo ás distintas circunstancias das persoas chegadas a Ceuta e aos procedementos establecidos en cada caso.
"O que non pode facerse é converter unha situación que require xestión, cooperación e responsabilidade nunha nova oportunidade para a confrontación política", afirmou.
Financiamento autonómico
Besteiro referiuse tamén á posición de Junts sobre o financiamento de Cataluña e reiterou o seu rexeitamento a un sistema de cupo ou concerto.
"Non compartimos que o financiamento de Cataluña sexa un cupo ou un concerto", afirmou. Ao seu xuízo, a reclamación formulada agora por Junts confirma precisamente que a proposta abordada no Consello de Política Fiscal e Financeira "nunca foi un cupo catalán, por moito que o PP o repetise".
Besteiro volveu reclamar ao Goberno galego que concrete a súa alternativa ao modelo de financiamento. "Cal foi a proposta económica que levou o conselleiro da Xunta ao Consello de Política Fiscal e Financeira? En que cantidade se traduce? E conta co apoio das demais comunidades gobernadas polo PP?", preguntou.
Para o líder socialista, a Xunta segue sen dar resposta a esas cuestións. "O PP de Galicia non ten un modelo de financiamento autonómico ou, se o ten, non o coñecemos. Non hai unha soa cifra concreta nin sabemos que recursos adicionais pretende conseguir para Galicia", afirmou.
Besteiro advertiu ademais de que calquera proposta que presente o Goberno galego debe aclarar se conta co respaldo das restantes autonomías gobernadas polo Partido Popular: "É importante sabelo agora para non levarnos despois ningunha sorpresa".