Besteiro reclama medidas urxentes ante a "emerxencia" da vivenda
O secretario xeral do PSdeG, José Ramón Gómez Besteiro, reclamou máis investimento en vivenda pública e medidas inmediatas para afrontar as dificultades de acceso á vivenda, despois de que o Congreso dos Deputados rexeitase os dous decretos impulsados polo Goberno central. As normas non lograron a maioría necesaria na votación celebrada este venres, co voto en contra, entre outros, do PP, Vox e Junts.
Besteiro participou en Santiago na concentración pola vivenda celebrada na praza do Obradoiro, onde advertiu de que "todos estamos en risco de ser vulnerables". O líder socialista galego criticou o resultado da votación e cuestionou especialmente o posicionamento do PP, Vox e Junts.
"Caeron as caretas dos que defendían o rescate á banca e miran para outro lado cando hai que rescatar ás persoas", afirmou. Besteiro tamén dirixiu as súas críticas ao PP galego e ao presidente da Xunta, Alfonso Rueda, ao considerar que o rexeitamento dos decretos supón, ao seu xuízo, non atender un dereito á vivenda digna que está recollido na Constitución.
O secretario xeral do PSdeG sinalou que a sociedade se atopa ante unha "situación de emerxencia" e reclamou que as políticas públicas dean prioridade ás persoas con maiores dificultades para acceder ou manter unha vivenda.
Entre as medidas que defendeu figura un incremento do parque público de vivenda. Besteiro apostou por "investir máis en vivenda pública e que esa vivenda siga sendo sempre pública", ao tempo que reclamou protección para as persoas que máis o necesitan e seguridade para os propietarios.
O socialista insistiu ademais en que a resposta non pode demorarse. "Esa emerxencia é hoxe, non dentro de cinco anos", sinalou, reclamando actuacións que permitan aumentar a oferta de vivendas a prezos asumibles.
Neste sentido, defendeu a recuperación de inmobles actualmente baleiros para incorporalos ao mercado do alugueiro, combinando esta medida con garantías para os arrendadores e evitando, segundo indicou, que esa protección poida amparar abusos.
"Queremos tamén rehabilitar e recuperar gran parte do patrimonio que hoxe non pode estar a disposición de ninguén", engadiu Besteiro, que situou estas actuacións entre as cuestións que considera fundamentais para afrontar o problema da vivenda.
O líder do PSdeG tamén vinculou o acceso á vivenda coa mobilidade. Ao seu xuízo, é necesario contar cun transporte "digno" que permita ás persoas desprazarse entre os seus lugares de residencia e os centros de traballo.
Besteiro subliñou que as dificultades relacionadas coa vivenda non afectan exclusivamente á mocidade. "O fundamental hoxe é preservar e protexer ese dereito á vivenda digna, non só para mozos e mozas, senón tamén para moitísima xente que sofre unha enorme dificultade para chegar a fin de mes", explicou.
Segundo engadiu, tamén existen persoas que actualmente dispoñen dunha vivenda pero que afrontan incerteza sobre a súa capacidade para mantela no futuro.
Na súa intervención, o secretario xeral dos socialistas galegos chamou finalmente a atender as demandas da "inmensa maioría" da sociedade e lembrou que a vivenda se incorporou ás principais preocupacións cidadás. "Foi a educación, foi a sanidade, foron as pensións e foi a dependencia, e hoxe é o momento de que o quinto piar do estado de benestar se faga efectivo", concluíu.