Burela prepara tres días de música co regreso do festival Osa do Mar
Burela volverá converterse esta semana nun dos puntos de encontro da música en Galicia coa celebración dunha nova edición do festival Osa do Mar. A programación desenvolverase do mércores 2 ao sábado 5 de setembro e combinará concertos, cinema, encontros con creadores e propostas audiovisuais, cun cartel no que conviven nomes consolidados e novas voces da escena musical.
A actividade comezará xa este mércores da man de Pantallas Sonoras, iniciativa impulsada pola Asociación Cultural Plataforma Ultramar en colaboración co festival Osa do Mar. O ciclo reforza este ano a súa presenza dentro da programación coa estrea do I Concurso de Videoclips Pantallas Sonoras.
Ás 19.30 horas, a Casa da Cultura acollerá a proxección de Ao son da nova regueifa (2025), obra de Manolo Maseda e Saúl Rivas que se achega á transformación da improvisación oral e á nova escena musical galega. Ao remate haberá un coloquio cos dous directores.
Depedro e The Rapants, entre os protagonistas do venres
O xoves 3, tamén ás 19.30 horas na Casa da Cultura, será a quenda de Casamance. Banda sonora dunha viaxe (2016), de Paloma Zapata. O documental conecta España e Senegal a través da música e conta coa participación de Depedro e Ángel Carmona. A directora manterá posteriormente un encontro co público.
A programación continuará esa mesma noite no Barco Museo, onde o audiovisual deixará paso á música en directo con Gara Durán e unha sesión posterior de Anxo Ferreira.
O venres 4 chegará unha das xornadas máis intensas do festival. Polo escenario pasarán West SRK, Depedro, Eris Mackenzie, The Rapants, Éxtasis, La Milagrosa e Señora DJ, nunha proposta que mestura diferentes estilos e xeracións.
Un sábado con Fillas de Cassandra, Ortiga e Ginebras
O sábado 5 concentrará a programación máis extensa. A música chegará da man de Kornucopia vs Pandeireteiros do Inferno, Ortiga, Xosé Maseda, Arume, Portosanto, Fillas de Cassandra, Xuventude, Ginebras, Rata, Sobrezero e Grande Osso.
Antes dos concertos, Pantallas Sonoras celebrará ás 12.00 horas unha das principais novidades desta edición: a final do seu primeiro concurso de videoclips. A convocatoria recibiu preto dun cento de propostas, das que once conseguiron chegar á selección definitiva.
Os finalistas son choromicas con MANIFIESTO R; Fillas de Cassandra con Insolación; Grande Amore con Ontes fun moi malo; hydn con TASTE; Jade4 con RÉQUIEM; Laura LaMontagne con Cuidado; O Xoán con Ferido; Pantis con A tarde ceiba; Sacoga con Tesela Azul; The Rapants con Non Sei Como; e Willow GHZ con SEGUIREI PERDENDO. Cinco das propostas seleccionadas corresponden a artistas ou realizadores lucenses.
O público poderá votar durante a sesión, que concluirá coa entrega dos premios deseñados polo artesán burelao Martín Lestao. O Premio do Xurado Profesional estará dotado con 500 euros e será decidido por Paloma Zapata, Saúl Rivas e Sara Roca. Tamén se concederán o Premio Fundación Eu Son e o Premio do Público.
Deste xeito, Osa do Mar volverá combinar durante catro días música en directo e creación audiovisual, mantendo a súa aposta por un cartel diverso e pola presenza da creación galega nun festival xa consolidado no calendario cultural de Burela.