Actualidade

O Goberno de España executará a conexión eléctrica entre Atios (O Porriño) e Vigo, unha infraestrutura que o alcalde considera clave para a industria e o futuro económico da cidade.

O alcalde de Vigo, Abel Caballero, celebrou a chegada da Moi Alta Tensión eléctrica á cidade tras “anos de pelexa e insistencia”. Segundo explicou, o Goberno de España destinará 72 millóns de euros para realizar a conexión dende Atios, no concello de O Porriño, ata Vigo.

Caballero lembrou que esta infraestrutura fora reclamada en anteriores etapas de goberno sen éxito e asegurou que, tras a chegada de Pedro Sánchez á presidencia, volveu insistir na súa inclusión na planificación eléctrica estatal. “A miña presión é sempre a favor de Vigo, goberne quen goberne”, subliñou.

O rexedor destacou a relevancia da Moi Alta Tensión para o desenvolvemento industrial e económico da cidade. Ao seu xuízo, sen esta infraestrutura eléctrica non sería posible garantir o progreso da industria viguesa nin a continuidade de proxectos estratéxicos como os da planta de Stellantis Vigo.

Caballero sinalou que o trazado xa está definido e considerou que esta conexión eléctrica reforza a posición de Vigo no mapa industrial, abrindo a porta á asignación de novos modelos e investimentos.