Caballero reclama a Rueda unha solución para a seca na área de Vigo
O alcalde de Vigo, Abel Caballero, enviou unha carta ao presidente da Xunta, Alfonso Rueda, na que reclama medidas para facer fronte aos problemas de abastecemento de auga que afectan á área de Vigo. Como principal solución, o rexedor propón poñer en marcha de maneira inmediata os estudos necesarios para construír un novo encoro augas arriba de Eiras, no río Oitavén, unha infraestrutura que, segundo lembra, leva reclamando desde hai 15 anos.
Caballero considera que Vigo está asumindo problemas de carácter supramunicipal derivados das dificultades do sistema de abastecemento e acusa á Xunta de non atender adecuadamente as necesidades da área. Neste sentido, sinalou que o Concello vigués está tendo que facerse cargo de actuacións que afectan tamén a outros municipios da contorna.
O alcalde referiuse especialmente á situación de Baiona, que, segundo explicou, afronta dificultades de abastecemento que obrigarán a Vigo a garantir a subministración de auga. Tamén lembrou que a cidade fornece auga potabilizada a Cangas e Moaña, mentres que o Concello xa acometeu a reparación dunha fuga detectada meses atrás na condución submarina que atravesa a ría.
Caballero defendeu que esta infraestrutura ten carácter supramunicipal e, polo tanto, considera que o seu mantemento debería corresponder á Xunta. A mesma situación, segundo indicou, prodúcese na condución que leva auga desde Eiras ata Redondela, onde se detectou un problema de filtración.
O rexedor avanzou que será novamente o Concello de Vigo quen asuma a actuación necesaria para solucionar este problema, aínda que considera que debería ser a Administración autonómica quen se responsabilizase dela, tanto polo seu carácter supramunicipal como polo feito de que a Xunta xestiona actualmente o encoro de Eiras.
“Imos seguir apoiando a todos estes municipios”, afirmou Caballero, que ao mesmo tempo reclamou á Xunta que asuma as súas competencias tanto na planificación de novas infraestruturas hidráulicas como na resolución das incidencias que afectan ao sistema de abastecemento.
O alcalde tamén reclamou ao presidente autonómico o cesamento da conselleira responsable da área, á que acusa de desatender unha cuestión que considera esencial para Vigo e para o conxunto da súa contorna. Caballero pediu ademais a Rueda que dea explicacións e “pida perdón a Vigo e a toda esta área” pola xestión dos problemas relacionados co abastecemento de auga potable.