Sociedade

A entidade atendeu ao longo de 2025 a un total de 7.834 persoas, mentres que máis de 32.000 resultaron beneficiadas dalgún dos programas

Cáritas Diocesana de Lugo atendeu ao longo de 2025 a un total de 7.834 persoas, mentres que máis de 32.000 resultaron beneficiadas dalgún dos programas impulsados pola entidade social. Os datos, presentados este xoves con motivo da celebración do Día da Caridade, reflicten un incremento da demanda de axuda respecto ao ano anterior e evidencian que o encarecemento da vida, o acceso á vivenda e a inestabilidade laboral están detrás de moitas situacións de vulnerabilidade.

A directora da entidade, Amparo González Méndez, explicou que o servizo máis demandado segue a ser o de acollida e acompañamento a persoas en risco de exclusión, no que se prestou apoio a máis de 1.700 familias durante o pasado exercicio.

Segundo indicou, unha das principais preocupacións detectadas é que cada vez son máis as persoas con emprego que recorren á organización para cubrir necesidades básicas. A subida dos alugueiros e dos gastos cotiáns provoca que moitas familias teñan dificultades para afrontar os pagos mensuais malia contar cun salario.

Desde Cáritas advirten ademais de que os procesos de pobreza son cada vez máis prolongados no tempo e afectan tamén ás novas xeracións. Neste sentido, a entidade desenvolve programas específicos dirixidos á infancia co obxectivo de favorecer a inclusión social e educativa dos menores. Durante o último ano máis dun cento de nenos e nenas participaron nestas iniciativas de acompañamento.

Outro dos aspectos destacados no informe anual é o incremento das persoas migrantes atendidas, que xa representan unha porcentaxe maioritaria entre quen solicita apoio. A entidade traballa especialmente no acompañamento para atopar vivenda, acceder ao emprego e tramitar distintas axudas sociais.

Tamén preocupa o aumento de persoas maiores que sofren soidade non desexada, unha realidade especialmente visible no rural lucense, onde Cáritas reforzou nos últimos anos os seus programas de atención e acompañamento.

Pola súa banda, a secretaria xeral da organización, Mónica Yáñez, puxo o foco no perfil predominante das persoas atendidas, formado na súa maioría por mulleres con cargas familiares, moitas delas nais soas con dificultades para acceder a unha vivenda ou a un emprego estable.

A presentación do balance anual coincide coa programación do Día da Caridade, que se celebrará a partir do 3 de xuño baixo o lema “Elixe amar, elixe comunidade”. As actividades incluirán actos informativos, recollidas solidarias e a entrega dos Premios Caridade 2026, nos que participaron arredor de 1.300 escolares.