Castro de Rei reuniu centos de persoas arredor da XV Expodegustación da Galiña de Mos
Castro de Rei volveu converterse nun punto de encontro para os amantes da gastronomía tradicional coa celebración da décimo quinta edición da Expodegustación da Galiña de Mos. A convocatoria, que combina a promoción culinaria desta raza propia da Terra Chá coa divulgación do traballo dos seus criadores, repartiu máis de 700 racións e congregou numerosas persoas nun ambiente familiar.
A organización mantivo a fórmula gastronómica que vén consolidándose ao longo dos anos. O menú incluíu ovo frito, polo de Mos preparado segundo a receita tradicional, arroz con esta raza avícola, queixo de Leitigal e bebidas. A resposta do público volveu ser destacada, con grupos que reservaron mesa con antelación e unha afluencia continuada durante o servizo.
O desenvolvemento da xornada contou coa colaboración de case trinta persoas voluntarias, encargadas de atender os comensais e sacar adiante o servizo de comidas. A cita está impulsada pola Asociación Galiña de Mos da Terra Chá, en colaboración co Concello de Castro de Rei, a través das áreas de Cultura e Rural, a Deputación de Lugo, Avimós, a asociación veciñal e Leitigal, entre outras entidades.
A entidade xa traballa na preparación da próxima edición, un proceso que comeza nos meses de febreiro e marzo coa cría dos polos. A continuidade do evento permite recoñecer o labor dos criadores e seguir promovendo esta raza autóctona.
Os criadores exhibiron preto de 70 exemplares
A programación incluíu tamén o XII Concurso Comarcal da Raza Galiña de Mos, no que participaron arredor de 70 aves procedentes de doce criadores de Castro de Rei, Vilalba, Pol, Begonte, Riotorto e Outeiro de Rei.
O xurado estivo presidido por Castor Rivero, que concedeu o premio ao mellor galo a Carlos Silvosa, de San Xiao de Mos, mentres que José Luis Freire Castedo, de Pol, obtivo o recoñecemento á mellor galiña. Na categoría de lotes de reprodutoras, o galardón foi para Luis Fernández, de Riotorto, e o de machos recaeu en José Zapata, de Castro de Ribeiras de Lea.
O concurso de billarda, outra das propostas habituais da xornada, reuniu participantes nas categorías masculina e feminina. Filloas de Sangue e Río Miño impuxéronse nas respectivas clasificacións por equipos. Na competición individual, Miguel Ángel foi o vencedor absoluto, por diante de Collazo e Xan; VIVI conseguiu o primeiro posto na categoría feminina, seguida de Delia e Sandra. Na categoría infantil, Adrián quedou primeiro, con Noa e Izan nos seguintes postos.
A festa completouse cunha exposición de vehículos clásicos, postos de artesanía, música a cargo do trío Ronsel e xogos populares organizados por O Cadaval. Entre as autoridades asistentes estiveron o alcalde de Castro de Rei, Francisco Balado; os representantes da Deputación Daniel García e Charli Rodríguez, e a parlamentaria Olalla Rodil.
A Expodegustación reafírmase así como unha cita que une gastronomía, tradición e promoción do sector gandeiro local, ao tempo que dá visibilidade ao traballo das persoas que manteñen viva a raza Galiña de Mos.