CCOO denuncia a falta de persoal funcionario nos xulgados
O sector da Xustiza de CCOO de Galicia sinala que a incorporación de 19 xuíces e xuízas e nove fiscais en Galicia, aprobada polo Consello de Ministros o pasado 13 de outubro, non vai acompañada dun incremento do persoal funcionario necesario para tramitar os procedementos e executar as resolucións xudiciais.
O sindicato alerta de que, sen os medios humanos necesarios, a creación de novas prazas xudiciais non permitirá mellorar o funcionamento da xustiza e podería agravar os atrasos e a saturación dos tribunais, conducindo a un risco de «colapso xudicial».
CCOO lembra que a actividade xudicial precisa de persoal suficiente para asumir a tramitación dos procedementos, as notificacións e a execución das sentenzas. Por cada nova praza xudicial, o sindicato estima necesaria, como mínimo, a dotación dun posto de letrado ou letrada da Administración de Xustiza, dous de xestión procesual, tres de tramitación procesual e dous de auxilio xudicial. Ademais, sinala que as recomendacións da Fiscalía Xeral do Estado instan a dotar as fiscalías de prazas de persoal funcionario nun número equivalente ao de fiscais.
A competencia en materia de medios persoais e materiais da xustiza pública é da Xunta de Galicia, a través da Dirección Xeral de Xustiza. Por iso, CCOO reclama a convocatoria inmediata dunha mesa sectorial para abordar a creación das 133 prazas de persoal funcionario que considera necesarias para acompañar a incorporación dos novos xuíces e xuízas e dos nove fiscais.
Sobrecarga de traballo nun sistema xa saturado
Comisións Obreiras sinala que a falta de persoal repercute directamente nas condicións laborais dos cadros de persoal actuais, que terían que asumir unha carga de traballo adicional nun sistema que xa presenta importantes dificultades, con sinalamentos tardíos e problemas para executar as resolucións xudiciais.
O sector da Xustiza de CCOO relaciona esta situación coa aplicación da nova lei de eficiencia organizativa, que, segundo denuncia, se levou a cabo de maneira improvisada e supuxo na práctica un recorte de persoal e de dereitos laborais.
Por todo iso, o sindicato insiste en que a creación de órganos e prazas xudiciais debe ir acompañada dos recursos humanos necesarios para garantir a tramitación dos procedementos e unha xustiza pública eficaz.
CCOO reclámalle á Xunta que actúe decontado para evitar que a falta de persoal siga condicionando o servizo á cidadanía e agravando a sobrecarga de traballo nos xulgados galegos.