CCOO denuncia que máis de 25.000 persoas traballan horas extra sen cobrar en Galicia
Comisións Obreiras denunciou que miles de persoas traballadoras galegas continúan realizando horas extraordinarias sen recibir ningunha compensación económica nin en forma de descanso. Segundo un informe elaborado polo sindicato a partir dos últimos datos da Enquisa de Poboación Activa (EPA), en Galicia traballáronse de media preto de 347.000 horas extra á semana durante o último ano, das que arredor de 128.000 quedaron sen remunerar.
Os datos indican que o 5,7 % da poboación asalariada galega realiza horas extraordinarias de maneira habitual, o que equivale a case 55.000 persoas. Delas, máis de 25.000 non perciben ningunha contraprestación polo tempo adicional traballado, cunha media de 5,1 horas semanais sen cobrar por persoa.
CCOO considera que esta situación constitúe unha forma de explotación laboral que continúa presente malia a entrada en vigor de medidas como o rexistro obrigatorio da xornada laboral. O sindicato critica que, mentres se debate sobre o absentismo laboral, persistan prácticas empresariais que vulneran os dereitos das persoas traballadoras.
Segundo os cálculos da organización sindical, cada persoa afectada deixa de percibir uns 7.700 euros anuais entre salarios e cotizacións sociais. No conxunto de Galicia, o custo laboral derivado destas horas extraordinarias non pagadas ascendería a uns 194 millóns de euros ao ano.
Ademais do impacto económico directo, CCOO sinala que o volume de horas extraordinarias realizadas sen compensación equivalería á creación de aproximadamente 3.400 postos de traballo a xornada completa, que actualmente non se están xerando.
A análise por sectores revela que a educación concentra o maior número de horas extra non remuneradas, con preto de 19.700 horas semanais, seguida das actividades sanitarias e de servizos sociais, con arredor de 16.900 horas. A industria manufactureira e a hostalaría completan os sectores con maior incidencia deste fenómeno.
En termos porcentuais, as actividades sanitarias e de servizos sociais encabezan a clasificación, xa que máis do 70 % das horas extraordinarias realizadas non reciben compensación. Tamén destacan as actividades administrativas e servizos auxiliares, a educación, as actividades financeiras e de seguros, a hostalaría e a construción.
O sindicato advirte de que esta práctica non só prexudica economicamente as persoas traballadoras, senón que tamén reduce os ingresos públicos procedentes das cotizacións e favorece situacións de competencia desleal entre empresas. Ademais, alerta de que a acumulación de horas de traballo sen descanso pode incrementar os riscos para a saúde laboral e favorecer a aparición de accidentes ou incapacidades temporais.
Ante esta situación, CCOO reclama un reforzo da Inspección de Traballo en Galicia, con máis recursos humanos e técnicos, así como a realización de auditorías sistemáticas dos rexistros de xornada, especialmente nos sectores onde se detecta unha maior incidencia das horas extraordinarias non pagadas. Tamén pide endurecer as sancións ás empresas incumpridoras e reforzar as campañas de información para que as persoas traballadoras coñezan os seus dereitos e os mecanismos de denuncia dispoñibles.