Economía

O sindicato considera que se trata do maior recorte rexistrado ata o momento e atribúe esta decisión a unha estratexia empresarial

CCOO denunciou que Correos reduciu arredor dun 40 % a contratación de verán na Área Noroeste, que abrangue Galicia, Asturias e Castela e León, respecto á campaña estival do pasado ano. O sindicato considera que se trata do maior recorte rexistrado ata o momento e atribúe esta decisión a unha estratexia empresarial baseada na redución continuada de custos laborais.

Segundo a organización sindical, esta diminución da contratación non responde a circunstancias puntuais nin a necesidades organizativas temporais, senón que forma parte dun modelo de xestión sustentado en conceptos como a eficiencia e a produtividade que, na práctica, se traduce en menos persoal, maior presión sobre os traballadores e unha progresiva deterioración do servizo postal público.

CCOO considera especialmente contraditorio que estes recortes se produzan mentres a dirección de Correos presenta publicamente a empresa como unha ferramenta clave para a cohesión territorial e social e anuncia a incorporación de novos servizos públicos. Desde o sindicato insisten en que non é posible reforzar unha empresa pública ao tempo que se reducen os recursos humanos necesarios para o seu funcionamento diario.

A denuncia coincide coa publicación do Informe Anual 2025 de Correos, no que a compañía informa dun beneficio de 11,5 millóns de euros. Para CCOO, estes resultados deben analizarse tendo en conta que unha parte importante procede da venda de patrimonio inmobiliario e dunha política continuada de contención do emprego e dos custos laborais. O sindicato sostén que non se poden presentar estas cifras como un éxito empresarial mentres continúa a redución de efectivos e aumenta a carga de traballo do persoal.

A central sindical alerta ademais de que a situación laboral na empresa segue marcada por unha elevada temporalidade, que cifra no 25 %, pola existencia de milleiros de traballadores pendentes de procesos de estabilización, por altos niveis de parcialidade e pola ausencia de novas ofertas públicas de emprego nos últimos catro anos.

CCOO subliña que este verán coincide unha circunstancia sen precedentes, xa que nunca as persoas que permanecen traballando durante o período estival tiveron que afrontar a campaña con tan pouca contratación de apoio e, ao mesmo tempo, nunca quen aspiraban a acceder a un contrato de verán atoparon tan poucas oportunidades laborais.

Segundo o sindicato, esta situación repercute directamente na calidade do servizo prestado á cidadanía e incrementa a sobrecarga de traballo, así como os riscos psicosociais e o desgaste físico e emocional do persoal. Neste sentido, lembra que Correos rexistra actualmente os niveis de absentismo máis elevados da súa historia recente, unha realidade que vincula coa deterioración continuada das condicións laborais.

CCOO critica tamén que a dirección continúe apelando ao esforzo e ao compromiso dos traballadores mentres mantén unha política de redución da contratación e de contención do emprego. A organización sindical sostén que o persoal leva anos asumindo máis carga de traballo con menos efectivos e considera que agora é a empresa a que debe cumprir cos seus compromisos.

Por todo iso, o sindicato reclama a recuperación dos niveis de contratación necesarios para garantir un servizo público de calidade, cubrir todas as vacacións, permisos e ausencias, reforzar os cadros de persoal e abrir unha negociación que permita reducir a precariedade e mellorar as condicións laborais. CCOO conclúe que sen emprego de calidade non pode existir un servizo público de calidade.