CCOO Ensino e catro sindicatos asinan un acordo histórico para mellorar o ensino público galego
CCOO Ensino e outras catro organizacións sindicais —ANPE, UGT-SP e CSIF— acadaron un acordo coa Consellería de Educación que supón un avance “histórico” no sistema educativo público non universitario de Galicia.
O pacto, que se desenvolverá normativamente nas próximas semanas, permitirá aplicar a partir do 1 de setembro de 2026 unha serie de medidas orientadas a mellorar as condicións do profesorado e a calidade do ensino.
Redución da carga lectiva e melloras organizativas
Entre as principais novidades figura a recuperación das 18 sesións lectivas semanais en Secundaria, Bacharelato, Formación Profesional e ensinanzas de réxime especial, cun total de 23 sesións de permanencia fixa no centro.
Tamén se recoñece por primeira vez a función titorial, coa correspondente redución de horario lectivo, e increméntase a dotación horaria para os equipos directivos.
Máis recursos para a atención á diversidade
O acordo inclúe unha aposta polo reforzo da atención á diversidade, coa actualización dos catálogos de persoal en Infantil e Primaria —sen cambios desde 2007— para incrementar o profesorado de Audición e Linguaxe e de Pedagoxía Terapéutica.
Ademais, prevese a incorporación de máis persoal de orientación e profesorado especialista nos centros con maiores necesidades.
Redución de ratios antes do previsto
Outro dos puntos destacados é o adianto ao curso 2028-2029 da redución progresiva de ratios na etapa de Secundaria, unha medida que busca mellorar a atención ao alumnado e as condicións de ensino.
Continuidade dun acordo iniciado en 2023
Este novo avance dá continuidade ao acordo estrutural asinado en 2023, que xa permitiu evitar o peche de aulas, consolidar máis de 650 postos docentes e reducir a carga lectiva en Infantil e Primaria.
Segundo as organizacións asinantes, estes cambios contribuíron a mellorar a organización dos centros e a adaptar o sistema ás necesidades do alumnado, especialmente nun contexto de descenso demográfico.
Chamamento ao diálogo fronte á confrontación
Os sindicatos destacan que os avances acadados son froito do diálogo e da negociación coa Administración, fronte a outras estratexias de confrontación.
Neste sentido, sinalan que a unidade sindical e o traballo continuado son claves para seguir mellorando o sistema educativo público galego.