CIG, UGT e CCOO condenan a agresión a unha xornalista na marcha do metal
Os sindicatos CIG, UGT e CCOO condenaron o incidente sufrido por unha xornalista este xoves durante a manifestación do sector do metal na Coruña. As tres centrais trasladaron o seu respecto ao traballo dos medios de comunicación e rexeitaron calquera comportamento agresivo, machista ou violento durante as mobilizacións.
Os feitos producíronse ao inicio da marcha, cando esta avanzaba pola contorna da ponte da Pasaxe en dirección á cidade. Segundo o relato da profesional, algunhas persoas participantes increpárona ao berro de 'niñata, únete'. Despois de responder que estaba traballando, recibiu máis insultos e o impacto dun petardo nun xeonllo, que lle causou unha ferida. A xornalista tamén sufriu un ataque de ansiedade.
O Colexio Profesional de Xornalistas de Galicia condenou o sucedido e cualificou os feitos como un ataque intolerable contra a liberdade de prensa. A entidade sostén que o lanzamento foi deliberado e que estivo precedido de insultos machistas contra a profesional que cubría a protesta.
Nun comunicado conxunto, CIG, UGT e CCOO aseguraron que tiveron coñecemento do episodio a través das informacións difundidas nas redes sociais e nos medios. As organizacións insistiron en que estas condutas non teñen cabida na acción sindical e lembraron que o labor xornalístico é esencial nunha sociedade democrática.
As centrais tamén pediron que o sucedido non se utilice para desacreditar o conxunto das persoas traballadoras mobilizadas. Segundo indican, os feitos foron protagonizados por un número moi reducido de persoas cuxa identidade descoñecen, polo que consideran que non se debe estender a responsabilidade aos miles de participantes na protesta.
O incidente marcou unha manifestación na que arredor de 4.000 traballadores do metal procedentes de toda a provincia percorreron o acceso á Coruña desde A Pasaxe ata a sede da patronal en Monelos. A marcha correspondía á sexta xornada de folga do sector para reclamar avances no convenio colectivo.
A mobilización celebrouse na véspera dunha nova reunión entre sindicatos e patronal, prevista para este venres ás 10.00 horas. As centrais esperan que o encontro permita desbloquear a negociación e evitar as novas xornadas de folga anunciadas para os días 16, 17 e 30 de xuño e 2 de xullo.