Turismo

Tamén cabe destacar que do 5 ao 10 de xullo celebráronse en Compostela os Xogos do Eixo Atlántico, nos que participaron máis de 2.000 deportistas galegos e portugueses

Os establecementos hoteleiros de Santiago de Compostela sumaron 156.234 estadías no pasado mes de xullo, segundo os datos do INE. Esta cifra representa un crecemento do 0,62% respecto do mesmo mes do ano pasado. No mes de xullo o turismo internacional volveu a superar o turismo doméstico, con 78.967 estadías fronte a 77.267.

O mes de xullo foi o cuarto mes consecutivo no que o turismo internacional, que en xullo subiu un 8,34%, supera o doméstico. Así, no acumulado anual, o turismo internacional suma xa o 56% das estadías que se producen na cidade, con 416.043, fronte ao 44% do turismo doméstico.

A maior presenza de turismo internacional, que en xeral ten un gasto medio superior, permite que se produza un incremento da tarifa media, que chegou a 105,31 euros, cun crecemento do 5% respecto do mesmo mes do ano pasado. O incremento do prezo é aínda maior se se miran os anos precedentes. Por exemplo, en xullo do Ano Santo 2022 o prezo medio foi de 89 euros.

A demanda turística da cidade viviu un período complexo debido ao peche da base de Ryanair no Rosalía de Castro a finais de outubro do 2025. Porén, tras a reapertura do aeroporto logo do peche de abril e maio polas obras, grazas ao incremento da conectividade internacional, con novas rutas e compañías, os datos do INE dispoñibles até o momento indican que a demanda, en xeral, está nun periodo de estabilización.

Tamén cabe destacar que do 5 ao 10 de xullo celebráronse en Compostela os Xogos do Eixo Atlántico, nos que participaron máis de 2.000 deportistas galegos e portugueses. Este evento atraeu tamén a un número moi relevantes de familiares, que sumaron miles de estadías na cidade neses días.

O evento, que tivo lugar na primeira quincena de xullo cando segundo o sector hai tradicionalmente unha baixada nas estadías en Compostela, foi financiado polos recursos xerados pola recarga municipal as estadías turísticas, demostrando que o reinvestimento do recadado contribúe a xerar un modelo turístico máis rendible e sustentable para o conxunto da cidade.

Os datos de xullo confirman tamén que Compostela segue a ser o principal destino turístico galego. Fronte ás 156.234 estadías de Santiago, A Coruña tivo 122.337, e Vigo 98.618.