Dacosta denuncia o modelo de prevención de incendios da Xunta: “Brigadas precarias e millóns sen executar”
A deputada do BNG Carmen Rodríguez Dacosta denunciou no Parlamento o modelo de prevención de incendios da Xunta, criticando a precariedade das brigadas forestais e a falta de execución dos fondos destinados á prevención.
Durante a súa intervención, Dacosta puxo o foco nas condicións laborais dos brigadistas, con contratos de apenas tres meses, formación limitada e salarios arredor dos 1.200 euros. “É este o modelo para afrontar lumes de quinta e sexta xeración?”, cuestionou.
A parlamentaria referiuse tamén ao caso do brigadista Yago Nogueira, que sufriu graves queimaduras nun incendio o pasado verán, para exemplificar os riscos aos que se enfrontan estes profesionais.
Millóns sen executar
Dacosta asegurou que, entre 2009 e 2025, o Goberno galego deixou sen executar 2.278 millóns de euros en programas de medio rural, dos cales arredor de 200 millóns estaban destinados á prevención e infraestruturas forestais.
Segundo indicou, as axudas a comunidades de montes veciñais convocadas en 2025 resolvéronse con máis dun ano de atraso, mentres que actuacións comprometidas, como a limpeza de franxas secundarias, seguen sen realizarse.
Ademais, criticou a baixa participación en programas como a orde de reforestación, que apenas recibiu solicitudes pese a contar cun orzamento de 15 millóns de euros.
Un verán marcado polos incendios
A deputada advertiu da gravidade da situación forestal en Galicia, lembrando que o verán de 2025 deixou máis de 120.000 hectáreas queimadas, especialmente na provincia de Ourense, e que incendios recentes xa afectaron a preto de 900 hectáreas en zonas como Ponteareas, Carballo ou Caión.
Tamén denunciou que, meses despois, a maior parte das axudas polos danos causados polos lumes aínda non foron abonadas.
Reclama cambios no modelo
Dacosta concluíu esixindo un cambio no sistema de prevención, cun servizo profesional único de brigadas e unha maior transparencia na execución dos fondos públicos.
Neste sentido, reclamou á Xunta que rinda contas “distrito a distrito e concello a concello” sobre as actuacións realizadas en materia de prevención de incendios.