Danza, tradición oral e circo enchen Santiago de actividades do Festival C entre o 17 e o 23 de agosto
O Festival C afronta a súa terceira semana de programación con novas propostas que combinarán danza contemporánea, narración oral, música tradicional e circo en diferentes espazos de Santiago. Entre o 17 e o 23 de agosto, a Casa das Máquinas, Bonaval, a Alameda, o parque de Galeras e a praza da Quintana serán escenario de actividades gratuítas dirixidas a públicos diversos.
A programación comezará o luns 17 de agosto na Casa das Máquinas. Ás 20.00 horas poderá verse “Diz-me, meu amor”, unha creación de Raquel Ferradás e María de Vicente. A peza presenta un encontro entre dúas intérpretes que, mediante a danza contemporánea, exploran as relacións afectivas, a memoria compartida e a construción dos vínculos a través do corpo e do movemento.
O martes 18, os arcos do parque de Bonaval acollerán ás 18.00 horas unha nova sesión de Contos no Parque, unha actividade organizada en colaboración co programa Apego. Nesta ocasión, Cris de Caldas levará ao público infantil “Tantarantiña”, unha proposta de narración oral para a primeira infancia que combina palabra, música e participación.
A tradición oral galega será a protagonista o mércores 19. Ás 20.00 horas, o paseo da Ferradura da Alameda acollerá a segunda sesión do ciclo “Por que non cantades todas?”, dedicado nesta edición ás cantareiras e ao seu papel na transmisión do patrimonio musical. O encontro estará protagonizado pola asociación Cantigas e Agarimos, que ofrecerá unha aproximación ao legado da música tradicional desde unha perspectiva contemporánea.
O xoves 20, tamén ás 20.00 horas, a praza da Quintana recibirá “Ardatzak (Eixes)”, da compañía vasca Zirkozaurre. O espectáculo recorre ás linguaxes do circo contemporáneo para abordar cuestións relacionadas cos apoios, os vínculos e o equilibrio mediante unha proposta visual vinculada ao espazo arquitectónico da praza.
Ao longo desta semana tamén continuarán no parque de Galeras os obradoiros de Circonove, destinados a nenas e nenos de entre 3 e 14 anos. As sesións, gratuítas e adaptadas ás diferentes idades, achegarán as artes circenses ao público infantil e requiren inscrición previa.
O Festival C, organizado polo Concello de Santiago a través de Compostela Cultura e co apoio da Deputación da Coruña, prolongará a súa programación ata o 31 de agosto. A edición reúne preto de trinta actividades relacionadas co circo, a danza, a música, a poesía, o cinema e as propostas familiares, mantendo unha programación gratuíta vinculada á creación contemporánea e ao uso do espazo público como lugar de encontro entre artistas e cidadanía.
A información sobre o conxunto da programación está dispoñible na web de Compostela Cultura. Os posibles cambios derivados de incidencias ou das condicións meteorolóxicas comunicaranse tamén a través desta web e das redes sociais de Compostela Cultura.