Darío Autrán debutará na dirección operística cunha nova produción de 'A Voz Humana' no Auditorio de Galicia
A produtora Abismo Caracol, en colaboración con Little Opera, dirixida por Conchi Moyano, presentará o vindeiro 11 de setembro no Auditorio de Galicia unha nova produción de A Voz Humana, a célebre ópera de Francis Poulenc baseada nun texto de Jean Cocteau. A montaxe suporá o debut do cineasta e produtor galego Darío Autrán como director de ópera, ampliando unha traxectoria artística que abrangue o cinema, o teatro, a interpretación e a produción escénica.
Afincado en Santiago de Compostela, Autrán desenvolveu boa parte da súa carreira no ámbito audiovisual. Como director cinematográfico asinou longametraxes como El Tirabeque, galardoada como Mellor Película no Universal Film Festival de Nova York e no City Blue Festival de Vigo, ademais de El cuarto de Mona e Tilda & Jean. Na actualidade atópase ultimando Entelequias, o seu novo filme, pendente de estrea comercial.
No eido teatral tamén dirixiu diferentes montaxes, entre elas Todo nunha noite, protagonizada por Manquiña e Ángela Andrada; Malvís e Fogo; O Lugar; e Entelequias, obra da que xurdiu precisamente a súa próxima adaptación cinematográfica.
A súa relación coa ópera comezou desde a produción. Durante a pasada tempada participou na produción de Carmen, na histórica posta en escena de Calixto Bieito estreada no Palacio da Ópera da Coruña, ademais de formar parte do equipo de producións como La finta semplice, La Bohème e L'elisir d'amore, traballando xunto ao director artístico Aquiles Machado e a Asociación de Amigos da Ópera da Coruña.
Segundo explicou o propio Autrán, a dirección operística era unha das disciplinas escénicas que aínda lle quedaban por explorar. “Na artes escénicas faltábame a dirección de ópera e estou entusiasmado con este reto. A ópera reúne moitas das disciplinas que sempre me apaixonaron: a interpretación, a música, a dirección e unha concepción moi cinematográfica da posta en escena”, sinalou.
A protagonista desta produción será a soprano Beatriz Riobó, que estará acompañada ao piano por Carlos Enrique Pérez. Ambos xa iniciaron os ensaios dunha proposta que se estreará o 11 de setembro ás 19.00 horas no Auditorio de Galicia.
As entradas xa están á venda a través de ataquilla.com a un prezo único de 15 euros. Ademais, as primeiras 300 persoas que adquiran a súa localidade poderán beneficiarse dun desconto empregando o código promocional SF3VOZ.
A proposta aposta por unha posta en escena íntima e próxima ao público, cunha marcada influencia visual inspirada no universo onírico e inquietante de Poulenc e Cocteau. O obxectivo é achegar ao espectador a intensa carga psicolóxica da protagonista, unha muller que afronta a súa derradeira conversa co home ao que ama.
Como novidade respecto á obra orixinal, Darío Autrán aparecerá tamén sobre o escenario interpretando un breve monólogo que dará voz ao marido da protagonista, un personaxe que nunca chega a verse na versión escrita por Cocteau. “Moitas veces acabo actuando nos meus propios proxectos. A escrita e a dirección énchenme profundamente, pero sigo sendo actor e é unha faceta que nunca quixen abandonar”, explicou.
Con esta nova produción, Abismo Caracol e Little Opera reforzan a súa aposta por unha ópera contemporánea, accesible e próxima ao público, na que a linguaxe escénica dialoga co cinema, o teatro e as novas formas de narración sen perder a esencia dun dos grandes títulos do repertorio operístico do século XX.
Tras a estrea de A Voz Humana, Darío Autrán xa traballa nunha nova produción operística xunto á Asociación de Amigos da Ópera de Santiago, cuxa estrea está prevista para o ano 2027.