Dúas propostas de música galega poñerán ritmo este martes ás Festas do Cristo de Cangas
As Festas do Cristo de Cangas de Morrazo vivirán este martes 25 de agosto unha noite dedicada á música galega coas actuacións de Nacho · Faia · Lar e Alana. As dúas propostas sucederanse a partir das 22.00 horas nas naves de Ojea dentro do programa provincial +Música.
A primeira actuación correrá a cargo de Nacho · Faia · Lar, un proxecto formado por Nacho Muñoz (Igmig), ao piano e electrónica, Faia Díaz (FAIA, de Vacas), á voz, e Lar Legido (Sumrrá), á batería.
O espectáculo, titulado 'De não saber o que me espera', achégase á figura e ao repertorio do cantante portugués Zeca Afonso desde unha perspectiva contemporánea e transgresora. A proposta combina música tradicional e experimental para ofrecer unha nova visión da súa obra.
A noite continuará con Alana, formación integrada por Antía Vázquez, Eloy Vidal e Pablo Castro. A súa proposta mestura música tradicional con ritmos electrónicos e pop a partir das recollidas de música popular, un traballo realizado coa colaboración de numerosas mulleres que contribúen a preservar a riqueza da tradición.
'O xeito á cántigha' é o título do seu primeiro disco, tomado dunha das recollidas de Dorothé Schubarth recompiladas no Cancioneiro Popular Galego Delfina de Cerceda.
O grupo conseguiu diferentes recoñecementos desde a súa creación. No seu primeiro ano de vida gañou o Premio Xuventude Crea na categoría de música e o concurso de bandas do Festival Internacional do Mundo Celta de Ortigueira. Tamén foi finalista como mellor proxecto de folk nos Premios da Música Galega Martín Códax e semifinalista como mellor álbum en galego nos Premios MIN.
Unha programación que chegará a 58 concellos
As actuacións de Cangas forman parte das 93 propostas que o programa +Música desenvolverá entre maio e decembro en 58 concellos da provincia de Pontevedra con menos de 50.000 habitantes.
A iniciativa conta cun orzamento de 700.000 euros, cos que a Deputación de Pontevedra asume os cachés dos espectáculos e apoia a programación cultural dos municipios.
O programa busca ademais descentralizar a oferta cultural e levar propostas de calidade a diferentes puntos da provincia, ao tempo que contribúe a difundir e fomentar a lingua e a cultura galegas.