Elas Eles alerta de que España avanza cara a unha maior regulación das granxas mentres Europa aposta por reducir cargas
A Asociación de Gandeiros Elas Eles alerta do que considera un “paradoxo” entre o rumbo que está tomando a regulación ambiental en Europa e as propostas do Goberno español para as explotacións gandeiras. Mentres a Comisión de Agricultura do Parlamento Europeo reclama unha normativa máis proporcionada e defende deixar o vacún fóra da Directiva de Emisións Industriais, España prevé incluír na regulación atmosférica explotacións de vacún desde pouco máis de 20 unidades de gando maior (UGM).
A entidade considera especialmente relevante esta situación para Galicia, onde o sector está formado maioritariamente por pequenas e medianas explotacións familiares. A comunidade conta con preto de 940.000 bovinos repartidos en máis de 23.500 granxas, segundo os datos achegados pola asociación.
Elas Eles advirte de que establecer limiares tan baixos podería traducirse nunha importante carga burocrática para un número elevado de explotacións sen que iso supoña necesariamente unha redución equivalente das emisións contaminantes.
“Europa está revisando a regulación precisamente porque considera necesario introducir proporcionalidade e reducir cargas innecesarias. Non parece coherente que España avance ao mesmo tempo na dirección contraria”, sinala a asociación.
Elas Eles defende que as políticas ambientais deben aplicar un criterio de proporcionalidade entre o custo das obrigas e o beneficio ambiental que se obtén con elas. Ao seu xuízo, os esforzos deberían concentrarse nas instalacións nas que as medidas permitan conseguir unha maior redución efectiva das emisións.
A asociación lembra ademais que o impacto ambiental dunha explotación non está determinado unicamente polo número de animais. Factores como o sistema produtivo, a superficie dispoñible, o pastoreo, a alimentación ou a xestión do esterco e dos nutrientes tamén inflúen.
Por este motivo, reclama ao Goberno español que revise os limiares previstos para as explotacións de vacún e que xustifique a introdución de novas obrigas para as granxas de menor tamaño mediante unha análise do custo e do beneficio ambiental.
Aviso sobre o risco de favorecer a concentración
A asociación tamén advirte de que unha regulación aparentemente igual para todas as explotacións pode ter efectos diferentes segundo o seu tamaño. As obrigas administrativas teñen custos fixos que unha granxa de grandes dimensións pode repartir entre un número elevado de animais, mentres que para unha explotación familiar poden representar unha carga moito maior.
Neste sentido, Elas Eles teme que o incremento das esixencias burocráticas poida contribuír indirectamente á concentración da actividade gandeira en explotacións de maior tamaño.
“Se queremos conservar un modelo de gandaría distribuída polo territorio, non podemos deseñar a normativa como se todas as explotacións fosen grandes instalacións industriais”, defende a asociación.
Elas Eles pide á Xunta de Galicia que traslade ao Goberno central a necesidade de adaptar a regulación á realidade produtiva galega e que se analice especificamente o impacto das novas obrigas sobre as pequenas e medianas explotacións.
Para a asociación, o debate aberto en Europa debería servir para revisar o rumbo da normativa española e apostar por medidas que permitan reducir as emisións concentrando os recursos nas actuacións que proporcionen un maior beneficio ambiental.