Elexido Paulo Carlos López como o novo portavoz da Fronte Ampla en Galicia
A mesa de partidos da Fronte Ampla en Galicia vén de nomear a Paulo Carlos López López como portavoz da coalición durante a campaña electoral, tras a proposta formulada por unanimidade pola Coordinadora Nacional de Movemento Sumar Galicia. Ademais, será o candidato ao Senado pola provincia de Pontevedra dentro da coalición Senado de Progreso.
Segundo indican fontes da organización, as súas funcións serán trasladar as posicións políticas da Fronte Ampla, participar nos debates electorais e acompañar os candidatos e candidatas nas súas respectivas circunscricións.
A coalición Fronte Ampla dará a coñecer publicamente mañá, martes 27, as súas candidaturas e as listas completas ao Senado e ao Congreso.
Paulo Carlos López López ten 40 anos e é secretario xeral de Movemento Sumar Galicia. É profesor titular de Ciencia Política na Universidade de Santiago de Compostela e doutor en Ciencia Política pola Universidade de Valencia e en Comunicación pola USC. Ademais, é licenciado en Xornalismo e en Ciencias Políticas.
Ao longo da súa traxectoria docente, impartiu clases en máis de media ducia de países de América Latina. Conta con máis de 160 publicacións científicas sobre comunicación política e comportamento, algunhas delas en editoriais e publicacións como Nature Portfolio, Routledge e Springer. Segundo os datos de Google Scholar, Scopus e Dialnet, figura entre os autores máis citados en España na súa área de investigación.