Sociedade

O encontro, organizado polo IES Rosalía Mera e a Deputación da Coruña, consolídase como unha das grandes citas do teatro de base en Galicia

O Teatro Colón foi escenario da gala de peche do XXVII Certame de Teatro Escolar e Afeccionado, unha edición que reuniu 947 persoas participantes e 74 montaxes teatrais, reafirmando a súa posición como referente no impulso das artes escénicas entre a mocidade e o tecido cultural afeccionado.

O certame contou con representacións tanto da provincia da Coruña como doutras zonas de Galicia e mesmo de comunidades como Madrid ou o País Vasco. Ao longo do proceso, as obras foron representadas previamente no IES Rosalía Mera, antes da entrega final de premios no teatro coruñés.

Durante a cerimonia entregáronse un total de 35 galardóns, cos que se recoñeceu o traballo artístico, técnico e educativo desenvolvido polos distintos grupos. A Deputación destacou o papel dos centros educativos, asociacións, compañías afeccionadas, profesorado e familias na consolidación dun proxecto que, tras 27 edicións, continúa medrando en participación e calidade.

No plano institucional, o deputado provincial José Ramón Rioboo puxo en valor o certame como un espazo xa consolidado de creación e aprendizaxe, subliñando o “poder transformador da cultura” e a importancia de achegar o teatro a todas as idades.

O Premio de Honra desta edición foi para Manuel Lourenzo, da compañía Casahamlet, nun recoñecemento concedido pouco despois do primeiro aniversario do seu pasamento.

No que respecta ao palmarés, o xurado distinguiu propostas en distintas categorías —benxamín, infantil, cadete e afeccionada—, nas que destacaron traballos colectivos que combinaron interpretación, dirección e creación escénica. Entre as obras máis recoñecidas figuraron títulos como Os Poetas e o Lume, No todos los Duendes son Verdes, O Principiño ou O Parvo, que obtiveron varios dos primeiros premios nas súas respectivas seccións.

Tamén se outorgaron distincións individuais a intérpretes, direccións e traballos de reparto, ademais de mencións especiais a creadoras e creadores polo seu labor artístico e pola posta en valor de temáticas sociais e humanas desde o escenario.

A gala pechouse cunha mensaxe de continuidade por parte da Deputación, que reiterou o seu compromiso co apoio ao teatro escolar e afeccionado como ferramenta de formación, convivencia e desenvolvemento cultural.