Falece Santy López, o fotógrafo sarrián que converteu a cámara nunha forma de mirar a vida

O fotoxornalista deixa un legado de máis de 70.000 imaxes, unha traxectoria de máis de catro décadas e un testemuño persoal da súa enfermidade a través do libro ‘Vida de amor e enfermidade’
Santy-López-Vida-amor-e-enfermidade-Sarria
22 Nov 2026

O fotógrafo sarrián Santy López faleceu este sábado aos 60 anos, deixando tras de si unha extensa traxectoria profesional de máis de catro décadas e un importante legado documental sobre a sociedade galega. A súa particular mirada detrás da cámara, a súa capacidade para captar a esencia das persoas e o seu compromiso coa fotografía marcaron unha carreira que tamén estivo ligada ao fotoxornalismo.

López, nacido en Sarria en 1966, dedicou boa parte da súa vida a retratar a realidade que o rodeaba. O seu traballo, caracterizado por unha especial sensibilidade cara ás persoas e ao seu entorno, converteuno nunha figura recoñecida no ámbito fotográfico lucense, onde era especialmente apreciado tanto pola súa calidade técnica como pola súa proximidade.

Nos últimos anos, o fotógrafo tamén converteu a súa cámara nunha ferramenta para documentar a súa propia enfermidade. En 2020 diagnosticáronlle un cancro de pulmón e, desde entón, decidiu rexistrar a súa experiencia a través de imaxes. 'Cando na primeira consulta dixéronme que tiña cáncer, á seguinte xa me presentei coa cámara', lembraba nunha entrevista.

Ese percorrido quedou plasmado no libro 'Vida de amor e enfermidade', unha obra formada por 222 fotografías nas que retratou durante catro anos os seus ingresos hospitalarios, os tratamentos de quimioterapia e inmunoterapia, as consultas médicas e os momentos máis íntimos da súa vida. O traballo converteuse nun testemuño da súa loita contra a enfermidade e da súa maneira de afrontar a vida a través da fotografía.

Un legado de 70.000 imaxes

A pegada de Santy López tamén permanecerá no patrimonio fotográfico galego. En 2023 cedeu á Consellería de Cultura un fondo de arredor de 70.000 imaxes para a súa conservación no Arquivo Histórico Provincial de Lugo, onde se custodia unha parte fundamental da súa obra.

Ademais, doou material fotográfico á Escola Ramón Falcón de Lugo, que lle dedicou unha aula en recoñecemento á súa achega e á súa vinculación coa formación fotográfica.

Unha exposición que percorre a súa traxectoria en Lugo

Precisamente, o Arquivo Histórico Provincial de Lugo mantén aberta a exposición 'Polos camiños da vida: o fondo fotográfico de Santy López', unha mostra que reúne 140 imaxes seleccionadas do seu arquivo e que pode visitarse ata a primeira semana de marzo de 2027.

A exposición propón un percorrido pola súa traxectoria desde finais dos anos setenta ata 2022, a través de oito bloques temáticos que permiten achegarse á evolución da sociedade galega desde a mirada do fotógrafo. Entre as imaxes atópanse fotografías vinculadas ao Camiño de Santiago, o servizo militar, o fotoxornalismo e as súas colaboracións con escritores e artistas, ademais de retratos e escenas da vida cotiá de Sarria e a súa comarca.

A mostra pon de relevo o valor histórico e documental da súa obra e permite descubrir a dimensión dun fondo que constitúe xa unha parte importante da memoria visual de Galicia.

Santy López deixa así unha obra que transcende o ámbito artístico e xornalístico. As súas fotografías permanecerán como testemuño de persoas, lugares e acontecementos, pero tamén dunha forma de entender a fotografía como ferramenta para observar, lembrar e contar a vida.

0.39525294303894