Política

Os socialistas subliñan que a súa traxectoria estivo marcada polo compromiso coa igualdade de oportunidades e pola loita contra o despoboamento do rural ourensán

O alcalde de Castrelo do Val, Vicente Gómez García, faleceu aos 72 anos tras un período marcado por problemas de saúde derivados dun cancro. O rexedor socialista, que se mantivo activo practicamente ata os últimos momentos, deixa tras de si unha longa traxectoria política e institucional vinculada á defensa do rural e ao servizo público.

Nado en Nocedo do Val, desenvolveu a súa vida profesional no sector da construción, onde traballou como ferrallista, e estivo tamén ligado á UGT. A súa andaina política comezou en 1989 no Concello de Verín, ao incorporarse á corporación municipal para substituír un compañeiro. Tras as eleccións de 1991 continuou na política local, chegando a desempeñar responsabilidades de goberno como concelleiro de Obras e tamén etapas na oposición.

En 1999 integrou a candidatura socialista de Castrelo do Val como número dous da lista encabezada por Raúl Fernández, exercendo como tenente de alcalde. En 2005 asumiu a Alcaldía tras o nomeamento de Fernández como delegado da Xunta e, desde entón, converteuse na principal referencia política do municipio. Revalidou a confianza da veciñanza en cinco procesos electorais consecutivos, sempre con amplas maiorías. Nas eleccións municipais de 2023 xa anunciara que aquel sería o seu último mandato.

O PSdeG-PSOE de Ourense expresou o seu profundo pesar polo falecemento do que considera un dos grandes referentes do municipalismo socialista da provincia. A formación destacou a súa dedicación ao progreso de Castrelo do Val, á defensa dos servizos públicos e á mellora da calidade de vida da cidadanía.

Os socialistas subliñan que a súa traxectoria estivo marcada polo compromiso coa igualdade de oportunidades e pola loita contra o despoboamento do rural ourensán. Ademais da súa responsabilidade como alcalde, tamén desempeñou funcións como deputado provincial.

Desde o partido lembran a súa proximidade coa veciñanza, a súa capacidade de diálogo e o profundo coñecemento da realidade do territorio. O secretario provincial do PSdeG-PSOE de Ourense, Álvaro Vila, salientou “a súa calidade humana, o seu compañeirismo e a súa permanente disposición para colaborar co partido e cos seus compañeiros e compañeiras”, asegurando que o seu legado permanecerá na memoria do socialismo ourensán.

A súa familia, composta pola súa muller e os seus dous fillos, así como amizades, veciños e compañeiros de partido, despedirano este venres no tanatorio La Paz de Verín. O sábado celebrarase un acto litúrxico na capela antes da súa incineración en privado.

Co seu falecemento desaparece unha das figuras máis coñecidas da política municipal ourensá das últimas décadas, un alcalde que dedicou máis de vinte anos ao goberno de Castrelo do Val e que fixo da política unha ferramenta de servizo á veciñanza.