Familias, docentes e sanitarios trasladan ao PSdeG as súas críticas ao proxecto de Lei de Educación Dixital de Galicia
Representantes de Adolescencia Libre de Móbiles, do programa Escola Saudable de Ecoloxistas en Acción e da Asociación Educación Activa mantiveron este martes unha reunión no Parlamento de Galicia co portavoz de Educación do Grupo Socialista, Aitor Bouza, para trasladarlle as súas preocupacións sobre o proxecto de Lei de Educación Dixital que tramita a Xunta.
As entidades presentaron ao deputado un documento con 30 consideracións nas que cuestionan os fundamentos da futura norma e alertan de que non incorpora as recomendacións formuladas por organismos científicos e sociedades profesionais dos ámbitos da medicina, a psicoloxía e a educación. Segundo sinalan, o texto lexislativo non ten en conta as evidencias existentes sobre os efectos do uso temperán das pantallas na aprendizaxe, a saúde e a privacidade da infancia e da mocidade.
Durante o encontro, as organizacións expuxeron que diversos informes e estudos internacionais relacionan un maior uso das pantallas nas aulas cun peor rendemento académico, ademais de advertir de posibles impactos sobre a concentración, a memoria, a lectoescritura, o desenvolvemento da linguaxe e a capacidade de aprendizaxe profunda.
Tamén alertaron dos efectos que, ao seu xuízo, pode ter a exposición temperá ás pantallas no neurodesenvolvemento e na saúde física e mental dos menores, citando cuestións como problemas de atención, dificultades na regulación emocional, alteracións do sono, ansiedade, depresión ou condutas adictivas.
As entidades defenderon que o proxecto de lei é incompatible coas recomendacións da Asociación Española de Pediatría e doutras sociedades científicas, que apostan por limitar o tempo de exposición ás pantallas segundo a idade, atrasar o acceso aos teléfonos intelixentes e ás redes sociais ata os 16 anos e fomentar a educación dixital sen necesidade de introducir ao alumnado como usuario habitual de dispositivos e plataformas.
Outro dos aspectos abordados foi a protección da privacidade. Os colectivos criticaron que a futura norma continúe permitindo o uso de servizos dixitais de grandes compañías tecnolóxicas nos centros educativos e reclamaron unha transición progresiva cara a ferramentas baseadas en software libre e sistemas que garantan un maior control dos datos persoais do alumnado.
Durante a reunión tamén expuxeron exemplos de medidas adoptadas noutros territorios europeos e comunidades autónomas para reducir a presenza das pantallas nas aulas, especialmente nas etapas educativas máis temperás.
Pola súa banda, Aitor Bouza mostrou interese por coñecer de primeira man as demandas e recomendacións trasladadas polos colectivos e comprometeuse a analizar as súas propostas no marco da tramitación parlamentaria da Lei de Educación Dixital de Galicia.