Política

A formación reuniuse en Santiago con representantes do Servizo de Axuda no Fogar para coñecer as súas reivindicacións e defender un modelo de xestión pública

O Centro Sociocultural da Caramoniña, en Santiago de Compostela, acolleu esta mañá un encontro entre representantes de Fronte Ampla e integrantes do Servizo de Axuda no Fogar (SAF) de Galicia para abordar a situación laboral do colectivo e as súas principais reivindicacións. Na reunión participaron a portavoz parlamentaria e candidata ao Congreso, Verónica Martínez Barbero; o portavoz de campaña e candidato ao Senado por Pontevedra, Paulo Carlos López; e o cabeza de lista ao Congreso pola Coruña, Xosé Lois Piñeiro.

Durante o encontro, os representantes da formación analizaron a precariedade laboral que afecta as traballadoras do SAF, un colectivo integrado maioritariamente por mulleres e que desempeña un papel fundamental na atención e no coidado das persoas dependentes en Galicia.

Xosé Lois Piñeiro defendeu a necesidade de reforzar os dereitos laborais destas profesionais e avanzar cara a un cambio no modelo de xestión do servizo. «Reunímonos cun colectivo que é un piar esencial da sociedade galega. O Servizo de Axuda no Fogar é moi necesario e debemos reforzar os seus dereitos laborais e a súa situación contractual nos concellos», sinalou. Neste sentido, apostou por unha xestión pública do servizo, dependente directamente da Xunta de Galicia.

O candidato tamén apuntou ás dificultades que teñen os municipios para asumir directamente a prestación e avogou pola implantación de mecanismos que garantan contornas laborais seguras e dignas. «Queremos asegurar a seguridade laboral e os coidados, así como previr os riscos que se producen no día a día do seu traballo mediante unha revisión e unha análise social nos concellos», explicou. Ademais, destacou que a formación está percorrendo Galicia para escoitar as demandas dos distintos colectivos e buscar fórmulas que permitan mellorar as súas condicións.

Pola súa banda, Verónica Martínez Barbero incidiu na necesidade de dar resposta ás reivindicacións históricas das traballadoras do SAF e reivindicou o papel que desempeñan na sociedade. «As mulleres do Servizo de Axuda no Fogar son o símbolo da dignidade deste país, son as coidadoras ás que máis temos que coidar», afirmou.

Barbero lembrou as medidas impulsadas durante esta lexislatura da man de Yolanda Díaz e a aprobación da Lei de Dependencia promovida por Bustindui para avanzar na mellora das condicións do colectivo, aínda que recoñeceu que «aínda queda moito por facer».

A portavoz parlamentaria tamén puxo o foco nas consecuencias físicas que ten o desempeño deste traballo, especialmente nun contexto de precariedade laboral. «Estas mulleres déixanse a vida e a saúde no seu día a día. Necesitamos actualizar e mellorar o cadro de enfermidades profesionais para que se faga cargo das lesións derivadas do seu traballo, o que permitirá mellorar o que cobran cando están de baixa», reclamou.

Finalmente, aproveitou o encontro para chamar á participación nas próximas mobilizacións e animar a clase traballadora galega a sumar forzas na folga xeral. «Animamos á xente traballadora deste país a sumar forzas na folga xeral. Imos estar nos piquetes e nas manifestacións, alí onde a clase traballadora galega estea reclamando unha vivenda digna, un salario digno e uns servizos públicos máis fortes e 100 % públicos», asegurou.

Barbero concluíu reivindicando o compromiso de Fronte Ampla coa defensa dos servizos públicos e coa mellora dos dereitos laborais e sociais, especialmente os das mulleres.