Funergal consolídase como o principal punto de negocio do sector funerario na Península Ibérica en 2026
A Feira Internacional de Produtos e Servizos Funerarios, Funergal, regresará a Expourense do 21 ao 23 de maio de 2026 para celebrar a súa 13ª edición, consolidándose como o principal centro de negocio do sector funerario na Península Ibérica este ano.
O certame, de carácter bienal, foi presentado este martes en Expourense nun acto no que participaron representantes institucionais e do propio sector. A organización destacou o papel da feira como único encontro internacional do ámbito funerario na Península este ano, combinando exposición de novidades, contactos profesionais e oportunidades de negocio.
Nesta edición, Funergal contará con 44 expositores procedentes de 10 países (Arxentina, Chile, El Salvador, Ecuador, España, Italia, México, Países Baixos, Perú e Portugal), ademais de visitantes profesionais destes mesmos mercados e doutros puntos internacionais. Portugal destaca especialmente no rexistro de acreditacións, con arredor do 35% dos profesionais confirmados ata o momento.
O evento reunirá empresas de toda a cadea de valor do sector funerario, desde fabricantes de ataúdes, urnas ou fornos crematorios ata compañías de servizos integrais, vehículos funerarios, material técnico, tanatopraxia, seguros, software especializado ou consultoría, ademais de asociacións profesionais e medios de comunicación especializados.
Segundo a organización, o obxectivo principal de Funergal é “o fomento do negocio, a competitividade e a actualización neste ámbito”, ofrecendo un espazo no que se combinan innovación, intercambio profesional e oportunidades comerciais.
PROGRAMA DE ACTIVIDADES
A feira incluirá un programa paralelo de actividades no que se recollen presentacións de produtos e servizos innovadores por parte dos expositores.
Entre as novidades desta edición destaca un obradoiro de arte floral funerario impartido pola florista Rita Soto, que terá lugar o 21 de maio ás 12.00 horas e estará aberto non só a profesionais do sector. Nesa sesión presentaranse as últimas tendencias en deseño floral.
Tamén se poderá visitar a exposición “Cinenterios”, promovida pola Asociación de Funerarias e Cemiterios Municipais AFCM-Cementerios Vivos, que ofrece unha visión cinematográfica dos cemiterios como espazos de memoria e patrimonio cultural. Ademais, exhibirase un carruaxe fúnebre tirado por cabalo cedido polo Grupo La Libélula.
A Fundación “Honor a quien Honor Merece”, con sede en México, entregará tamén os seus galardóns internacionais o 22 de maio ás 17.30 horas, recoñecendo contribucións destacadas ao sector funerario.
O encontro completarase cun programa social que inclúe unha cea de gala e a tradicional degustación de “pulpo á feira”, organizada pola Asociación Provincial de Empresas Funerarias de Ourense (APEFO), que volverá exercer de anfitrioa.
A organización subliña ademais a boa conectividade de Ourense grazas á alta velocidade ferroviaria, que sitúa a cidade a 2 horas e 15 minutos de Madrid, así como o convenio con Renfe que permitirá descontos do 10% para asistentes.
Funergal 2026 está patrocinada pola Deputación de Ourense e conta coa colaboración de grandes grupos do sector como Interfunerarias e Grupo Albia.