Xustiza

13 estarán destinadas aos tribunais de instancia, catro reforzarán as audiencias provinciais de Pontevedra, Vigo e A Coruña, e outras dúas serán de adscrición territorial

Galicia verá reforzada a súa estrutura xudicial e fiscal coa creación de 19 novas prazas de xuíces e 7 de fiscais, unha medida impulsada polo Ministerio da Presidencia, Xustiza e Relacións coas Cortes no marco da modernización do Servizo Público de Xustiza. A ampliación forma parte dun plan estatal que combina reformas procesuais, organizativas e dixitais co obxectivo de dotar a Administración de Xustiza das ferramentas necesarias para afrontar os desafíos actuais e futuros.

No caso galego, a planta xudicial medrará un 5,2%. Das 19 novas prazas de xuíces previstas para a comunidade, 13 estarán destinadas aos tribunais de instancia, catro reforzarán as audiencias provinciais de Pontevedra, Vigo e A Coruña, e outras dúas serán de adscrición territorial, polo que poderán desprazarse en función das necesidades e das cargas de traballo existentes en cada momento.

Entre os tribunais de instancia que se verán reforzados figuran os da Coruña, Ferrol, Santiago de Compostela, Lugo, Ourense, Pontevedra e Vigo.

A nivel estatal, a ampliación contempla a creación de 500 novas prazas xudiciais. Delas, 368 corresponderán a tribunais de instancia e 96 a órganos colexiados, repartidas entre as audiencias provinciais, os tribunais superiores de xustiza, o Tribunal Supremo e a Audiencia Nacional. Ademais, créanse 34 prazas de adscrición territorial e dúas para o Tribunal Central de Instancia. Con esta medida, a planta xudicial española, integrada por 5.887 prazas, increméntase nun 8,5%.

Por ordes xurisdicionais, o ámbito civil será o máis reforzado, seguido do social.

Dende o Ministerio lembran que esta ampliación é posible grazas á Lei de Eficiencia do Servizo Público de Xustiza, que substitúe os antigos xulgados unipersoais polos novos tribunais de instancia. Este modelo agrupa varios xuíces baixo unha única Oficina Xudicial de apoio técnico, permitindo unha organización máis flexible e eficiente.

Segundo os datos facilitados polo departamento ministerial, a creación dunha nova praza xudicial neste sistema ten un custo aproximado de 100.000 euros, fronte aos 500.000 euros que supuña a posta en marcha dun xulgado tradicional. Deste xeito, a creación das 500 novas prazas representa un investimento duns 55 millóns de euros, moi inferior aos 260 millóns que serían necesarios co modelo anterior.

Pola súa banda, a plantilla do Ministerio Fiscal en Galicia medrará un 4,5% coa incorporación de sete novos fiscais. No conxunto do Estado crearanse 200 novas prazas destinadas a reforzar áreas consideradas estratéxicas, como a loita contra os delitos de odio e discriminación, a trata de persoas, a estranxeiría e a violencia sobre a muller.

Tamén se incrementarán os recursos destinados á Inspección Fiscal, á cooperación penal internacional e á loita contra a criminalidade informática, ao tempo que se crea unha nova praza de fiscal de sala responsable da Unidade de Protección de Datos.

A distribución das novas prazas realizouse atendendo a criterios obxectivos como a carga de traballo, a litixiosidade e a poboación, así como ás necesidades trasladadas polo Consello Xeral do Poder Xudicial, a Fiscalía, as comunidades autónomas con competencias transferidas e os tribunais superiores de xustiza.