Galicia recibirá 399 millóns do novo Plan Estatal de Vivenda ata 2030
A ministra de Vivienda y Agenda Urbana, Isabel Rodríguez, presidiu este xoves a Conferencia Sectorial de Vivenda e Axenda Urbana, na que se acadou o acordo unánime de todas as comunidades e cidades autónomas para aprobar a distribución definitiva dos fondos do Plan Estatal de Vivenda 2026-2030.
O novo plan mobilizará un investimento total de 7.000 millóns de euros, dos que 800 millóns corresponden á anualidade de 2026. No caso de Galicia, a asignación prevista para o próximo ano ascenderá a 45,6 millóns de euros, mentres que o investimento global previsto ata 2030 será de 399 millóns de euros destinados ao desenvolvemento de políticas públicas de vivenda na comunidade.
Durante a reunión, Isabel Rodríguez destacou o consenso acadado entre administracións de diferentes cores políticas para afrontar os problemas de acceso á vivenda. “É moi importante a mensaxe que hoxe lanzamos á cidadanía: distintas administracións puxémonos de acordo”, sinalou a ministra, quen defendeu que a solución ao problema da vivenda pasa polo diálogo institucional e pola procura de respostas compartidas.
O novo Plan Estatal de Vivenda nace da proposta formulada polo presidente do Goberno, Pedro Sánchez, na Conferencia de Presidentes celebrada en Barcelona, co obxectivo de impulsar un gran acordo estatal en materia de vivenda.
Segundo explicou o Ministerio, o plan foi elaborado tras manter 28 reunións coas comunidades autónomas e diversos encontros con entidades sociais, expertos e axentes do sector. En total, recibíronse 365 achegas que foron estudadas e incorporadas ao documento final.
O novo modelo establece un sistema de corresponsabilidade no financiamento, no que o Goberno central asumirá o 60 % do investimento e as comunidades autónomas o 40 % restante. Ademais, o plan fixa que polo menos o 40 % dos fondos se destinen á construción e adquisición de vivendas, un 30 % á rehabilitación do parque residencial existente e o outro 30 % a medidas de protección para colectivos e territorios con maiores necesidades.
Entre as novidades incorporadas figura tamén a protección permanente das vivendas construídas con fondos públicos, así como mecanismos de control e transparencia nas adxudicacións de vivenda protexida mediante cláusulas antifraude.
O Plan Estatal de Vivenda inclúe ademais medidas orientadas a reforzar a cohesión territorial e a creación dun sistema público de datos que facilite á cidadanía o acceso a información transparente sobre o mercado da vivenda.