Galiza Nova presenta unha campaña na Coruña para situar a soberanía no debate sobre o futuro da mocidade galega
Galiza Nova presentou este xoves a campaña 'Construír a soberanía. Terra, paz e futuro', unha iniciativa coa que a organización xuvenil pretende situar no centro do debate as dificultades que, segundo sinala, afronta a mocidade galega para construír un proxecto de vida autónomo.
A campaña abordará cuestións como o acceso á vivenda, a precariedade laboral, a emigración, os servizos públicos e as dificultades de mobilidade, pero tamén a capacidade de Galicia para tomar decisións sobre o seu propio futuro. O secretario xeral de Galiza Nova, Artai Gabiás, considera que estas problemáticas están relacionadas cun modelo político e económico que a organización cualifica de dependente.
'Vivenda inaccesíbel, precariedade laboral, emigración, desmantelamento de servizos públicos, dificultades para desprazarse, e a imposibilidade de decidir sobre o futuro do noso país forman parte do día a día da mocidade galega', sinala Gabiás. Segundo o dirixente xuvenil, 'non son problemas illados', senón que responden, ao seu xuízo, a unha causa estrutural vinculada ao modelo de dependencia política que, segundo Galiza Nova, se impón sobre Galicia.
A vivenda, unha das prioridades da campaña
Entre os asuntos que centrará a campaña atópase o acceso á vivenda. Galiza Nova asegura que unha parte importante da mocidade continúa vivindo no domicilio familiar mesmo cando xa conta cun salario e reclama cambios nas políticas de acceso á vivenda.
A organización sitúa entre as súas principais propostas o incremento do parque público, a limitación dos prezos dos alugueiros e a regulación das vivendas de uso turístico. Neste ámbito, dirixe as súas críticas principalmente á Xunta, á que responsabiliza de ter as competencias fundamentais en materia de vivenda.
Galiza Nova asegura que a situación actual está dificultando a emancipación da mocidade e cuestiona tamén algunhas das solucións propostas polas administracións para facilitar o acceso a un fogar. A organización defende que a vivenda debe ser entendida como un dereito e non como un ben sometido exclusivamente ás dinámicas do mercado.
Precariedade laboral e problemas de mobilidade
A campaña tamén abordará as condicións laborais da mocidade. Gabiás asegura que existe unha situación de precariedade caracterizada, segundo a súa análise, por salarios baixos e por un mercado laboral no que considera que existen dificultades para desenvolver proxectos profesionais estables.
A organización relaciona esta situación coa estrutura económica galega e reclama cambios no modelo produtivo para favorecer o emprego e evitar que a mocidade teña que marchar fóra para atopar oportunidades laborais.
Outro dos eixos será a mobilidade. Galiza Nova denuncia dificultades no transporte público e considera que estas obriguen parte da mocidade a depender do vehículo privado para desprazarse. A organización critica tanto a situación do transporte por estrada como a ausencia de servizos ferroviarios de proximidade e cuestiona a calidade e frecuencia dalgunhas conexións.
Unha campaña con actos por toda Galicia
'Construír a soberanía. Terra, paz e futuro' desenvolverase durante os próximos meses con actos nas diferentes comarcas e accións nas rúas. O primeiro gran encontro será o sábado 17 de outubro, ás 19:00 horas, no espazo cultural Portas Ártabras, na Cidade Vella da Coruña.
Galiza Nova pretende que a campaña sirva para vincular as dificultades cotiás da mocidade co debate sobre o modelo de país e para defender, desde a súa perspectiva política, unha maior capacidade de decisión de Galicia sobre cuestións como a vivenda, o emprego, os servizos públicos ou a mobilidade.
'Pór a cuestión nacional no centro do debate da emancipación xuvenil é fundamental para espertar a conciencia na mocidade galega sobre as problemáticas que sofre no seu día a día, as causas que as provocan e o camiño a percorrer para resolvelas', afirma Gabiás.