Indra instalará nas Pontes unha nova planta de produción de vehículos militares
Indra anunciou a posta en marcha dunha nova fábrica de vehículos militares nas Pontes, unha instalación que suporá un novo impulso industrial para o municipio e que se enmarca na estratexia da compañía para converter o corredor norte de España nun dos maiores polos industriais de plataformas terrestres de Europa.
Para desenvolver este proxecto, a empresa adquiriu uns terreos de máis de 50.000 metros cadrados, cunha superficie construída de preto de 15.000 metros cadrados, nos que realizará un investimento de arredor de 18 millóns de euros.
A nova planta permitirá crear entre 70 e 120 empregos directos de alta cualificación en Galicia, aos que haberá que sumar os numerosos postos de traballo indirectos xerados na cadea de subministración, entre provedores e empresas de servizos asociadas á actividade industrial.
A fábrica das Pontes integrarase na división Indra Land Vehicles e sumarase ao centro de produción aberto o pasado ano en Xixón, elevando a superficie industrial construída desta área ata os 40.000 metros cadrados. A compañía prevé ampliar esta capacidade coa incorporación dunha terceira planta, aínda en proceso de selección, que permitirá alcanzar un total de 55.000 metros cadrados de instalacións industriais no corredor norte.
Segundo explicou a empresa, o centro das Pontes especializarase na integración de vehículos anfibios de combate, vehículos lanzaponte e sistemas de artillaría sobre rodas destinados ás Forzas Armadas españolas. A planta contará coa capacidade necesaria para integrar, probar, validar e poñer en servizo estes sistemas, ademais de incorporar novas capacidades industriais para afrontar programas de alta complexidade. O complexo disporá tamén dunha pista de probas propia que permitirá acelerar os procesos de desenvolvemento e entrega.
O conselleiro delegado de Indra Group, Josep María Recasens, destacou que o proxecto vai máis alá da ampliación da capacidade produtiva da compañía. Segundo sinalou, o obxectivo é crear unha nova xeración de fábricas deseñadas desde a súa orixe para integrar tecnoloxías de dixitalización avanzada, automatización e intelixencia artificial, co propósito de situalas entre as máis eficientes e competitivas de Europa.
A compañía busca reforzar a súa capacidade industrial para ofrecer prazos de entrega máis rápidos, fiables e competitivos que os existentes actualmente no mercado, ao tempo que consolida o desenvolvemento da industria de defensa española e europea.
No ámbito da fabricación de vehículos militares, Indra estima que o corredor norte terá capacidade para integrar e producir arredor de 500 unidades anuais, converténdose así nun dos principais polos industriais especializados en plataformas terrestres de Europa.
Esta iniciativa forma parte dun plan máis amplo para ampliar a presenza industrial da compañía en todo o territorio español, seguindo os tres corredores estratéxicos definidos polo Ministerio de Defensa. Dentro desta estratexia, Indra prevé multiplicar a súa superficie produtiva, pasando dos actuais 36.000 metros cadrados a máis de 154.000, mediante un investimento superior aos 200 millóns de euros e coa creación de máis de 1.000 empregos industriais directos e outros 1.400 postos de traballo de enxeñaría e alta cualificación.