Inicio de curso: nove meses para decidir o futuro político de Sarria
Setembro devolve os nenos e adolescentes ás aulas, pero tamén devolve a política á súa particular rutina. Comeza un novo curso e, con el, unha conta atrás que en Sarria xa non se pode ignorar: quedan nove meses para as eleccións municipais do 23 de maio de 2027. Nove meses nos que haberá que saber que queda realmente do pacto entre Camiña Sarria e Partido Popular, que proxectos chegarán a executarse e, sobre todo, quen estará disposto a disputar o futuro político da vila.
Porque en Sarria o calendario electoral comeza a pesar. O que durante meses podía parecer afastado está xa suficientemente preto como para que cada decisión, cada investimento e cada movemento político comece a ter lectura electoral. E neste escenario, o Acordo para o Desenvolvemento Estratéxico de Sarria (ADES), asinado hai un ano por Camiña Sarria e PP, convértese nun dos principais elementos para medir o que foi o mandato e o que pode acontecer nas próximas eleccións.
Porque o taboleiro electoral xa está colocado. Só faltan por coñecer algunhas das pezas e, sobre todo, onde decidirá colocarse cada unha.
QUINCE COMPROMISOS E AS ACTUACIÓNS EN MARCHA
Camiña Sarria e PP asinaron en setembro de 2025 o ADES como marco de diálogo e cooperación ata maio de 2027. O acordo apostaba pola estabilidade institucional, a lealdade entre administracións, unha planificación realista e unha comunicación transparente.
A folla de ruta incluía 15 actuacións: a mellora do Estadio Municipal da Ribela e do CEIP Frei Luis de Granada, a urbanización e cesión das travesías urbanas da LU-546, o apoio á Residencia de Persoas Maiores Nosa Señora do Carme, a sinalización viaria, a humanización da Praza da Vila ou a rehabilitación e musealización de Vila Andrea.
Tamén figuraban actuacións sobre a rede de auga, a creación dun parque ou praza nas vivendas anexas ao colexio, a mellora da Casa da Cultura e da Escola de Música, a posta en valor do barrio da Estación e do río Celeiro, a revalorización da Ponte Ribeira, un segundo Xulgado de Primeira Instancia, unha solución para o antigo centro de saúde e o muíño do Toleiro e a segunda fase do Polígono do Morelle.
Porén, un ano despois, só catro das 15 actuacións están en fase de desenvolvemento. A máis visible é a intervención no Estadio da Ribela, mentres avanzan tamén as actuacións relacionadas co CEIP Frei Luis de Granada, as travesías urbanas da LU-546 e a residencia de maiores.
O tempo comeza a ser, polo tanto, un factor político. O acordo foi deseñado para chegar ata maio de 2027 e agora quedan nove meses para que unha parte importante do prometido se converta en realidade.
CARMEN JOSÉ LÓPEZ, PONTE ENTRE CONCELLO E XUNTA
Neste escenario, o Partido Popular chega tamén con candidata coñecida. Carmen José López previsiblemente repetirá como cabeza de lista tras ser a persoa coa que Claudio Garrido asinou o ADES.
A súa posición nestes meses foi a de defender e impulsar desde a oposición aquelas actuacións que forman parte do pacto, ao tempo que busca, a través da Xunta de Galicia, financiamento para facer posibles diferentes proxectos incluídos na folla de ruta.
O papel do PP resulta así especialmente singular: é oposición no Concello, pero forma parte dun acordo co Goberno municipal e, ao mesmo tempo, ten capacidade de interlocución coa Xunta, administración gobernada pola súa mesma formación.
López e os populares levaron a diferentes plenos iniciativas vinculadas a necesidades de Sarria e a problemas que aparecen recollidos no ADES. A súa candidatura deberá afrontar agora o reto de explicar á cidadanía que parte do acordado puido avanzar grazas á súa intervención e que proxectos continúan pendentes.
E esa posición tamén pode converterse nun argumento electoral: o PP poderá reivindicar a súa capacidade de conseguir investimentos e interlocución institucional, mentres Camiña Sarria terá que responder polo nivel de execución do acordo.
O BNG, CLAVE NA VILA
No outro lado do taboleiro aparece Efrén Castro, previsiblemente candidato do BNG á Alcaldía de Sarria. O nacionalista conta cunha posición institucional que lle permite mirar cara ás próximas municipais desde unha situación diferente: é vicepresidente da Deputación de Lugo.
Desde ese cargo ten capacidade para impulsar actuacións e conseguir investimentos para o municipio, mentres continúa levando propostas ao pleno municipal. Unha forma de facer política que tamén lle xerou críticas, precisamente porque en determinadas votacións o BNG coincide co Goberno de Camiña Sarria.
A súa posición, porén, é clara: apoiar aquelas propostas que considera beneficiosas para Sarria independentemente de quen as presente. Unha estratexia que lle permite reivindicar unha política baseada nos resultados, pero que tamén abre unha vía de ataque para os seus adversarios, que cuestionan que o BNG sexa suficientemente crítico co Executivo local.
Castro chega así ás eleccións cunha dobre baza: a súa presenza no Goberno provincial e o traballo realizado desde a oposición municipal. O reto será transformar esa capacidade de actuación en apoio electoral e convencer á veciñanza de que existe unha alternativa ao actual Goberno.
O PSOE, A GRAN INCÓGNITA
Se hai unha formación onde o escenario aparece máis aberto, esa é o PSOE. Benjamín Escontrela, cabeza de lista socialista nas municipais de 2023, continúa sendo unha das grandes incógnitas de cara a 2027.
A súa candidatura foi unha aposta do entón secretario provincial José Tomé, pero desde o primeiro momento xerou críticas dentro das propias filas socialistas. En decembro de 2023, poucos meses despois das eleccións municipais, militantes do PSOE de Sarria cuestionaron publicamente a súa actuación e aseguraron que, pleno tras pleno, "estaba a demostrar non rexerse por ningunha directriz socialista".
As discrepancias internas non desapareceron co paso do tempo. En 2025, varios militantes socialistas de Sarria volveron manifestar o seu malestar polo que consideraban un "reiterado incumprimento dos estatutos e do regulamento do partido por parte da executiva municipal".
A controversia estaba relacionada coa convocatoria dunha Asemblea Extraordinaria para a elección de delegados ao 15º Congreso Nacional Galego, un proceso que, segundo os críticos internos, estivo marcado por irregularidades.
Todo isto fai que a continuidade de Escontrela como candidato non estea clara e que o PSOE de Sarria afronte tamén unha posible reorganización interna antes de chegar ás municipais.
NOVA PRESIDENTA DA DEPUTACIÓN E NOVA COMISIÓN XESTORA SOCIALISTA
A chegada de Carmela López á Presidencia da Deputación de Lugo, tras a saída de José Tomé, introduce tamén unha nova variable no escenario político sarriao. Ademais, Luis Ángel Lago Lage preside a nova Comisión Xestora que asume a dirección do PSdeG-PSOE na provincia de Lugo desde decembro de 2025, o que tamén incide nas pezas do taboleiro.
O cambio na Deputación produciuse nun momento no que o socialismo sarriao arrastra desde hai anos diferentes conflitos internos. Por iso, a nova etapa provincial podería ter consecuencias tamén na política local, especialmente á hora de decidir quen encabezará a candidatura socialista en 2027 e que relación manterá a estrutura provincial coa agrupación de Sarria.
Neste contexto, Benjamín Escontrela continúa sendo unha das incógnitas, mentres que tamén permanece aberta a posibilidade de que o PSOE busque un novo perfil para afrontar as próximas municipais. A nova dirección política da provincia, canalizada actualmente a través da Comisión Xestora, terá que xogar un papel relevante nesa configuración.
E aquí aparece unha hipótese especialmente importante para o taboleiro político de Sarria: un eventual reencontro entre o PSOE e Claudio Garrido, antigo socialista e actual alcalde por Camiña Sarria. Se a formación independente perde forza ou non continúa como proxecto, o novo escenario provincial podería facilitar conversacións que hoxe parecen afastadas.
O cambio producido no socialismo provincial abre unha porta que durante os últimos anos parecía practicamente pechada. E nun Concello no que as alianzas poden acabar sendo determinantes para formar Goberno, calquera porta entreaberta pode terminar converténdose nunha das pezas máis importantes da mesa de xogo.
Aínda que o alcalde, Claudio Garrido, parecía ter asumido que esta lexislatura podía ser o final da súa carreira política, pero a situación do ADES e a frustración ante o escaso avance de parte dos compromisos parecen ter reactivado a súa ambición de continuar.
Agora, debe decidir se volverá encabezar Camiña Sarria, se o proxecto terá continuidade con outra persoa ou se, finalmente, se abrirá a porta a outro escenario político.
A súa decisión condicionará boa parte do taboleiro. Se Garrido repite, Camiña Sarria terá que defender o balance do seu mandato e do pacto co PP. Se non o fai, o futuro da formación queda igualmente aberto. E se a formación se desfai, o seu pasado socialista pode volver aparecer como unha vía de futuro.
NOVE MESES PARA MOVER AS PEZAS
Sarria comeza así un curso político no que cada movemento terá cada vez máis importancia. O ADES entra na súa recta final, o PP prepara a continuidade de Carmen José López, Efrén Castro perfila un novo asalto á Alcaldía desde o BNG e o PSOE debe decidir se mantén a aposta por Benjamín Escontrela ou busca un novo rostro para recuperar posicións.
Por riba de todos eles, Claudio Garrido mantén aberta a principal incógnita: continuar, cambiar de rumbo ou abrir unha nova etapa. Neste nove meses haberá negociacións, conversas, posibles acordos e tamén movementos internos que poden alterar o escenario actual.
As pezas deste taboleiro de xadrez xa comezaron a moverse, aínda que algunhas continúan esperando o momento exacto para cambiar de posición. E será nese movemento, máis que nos discursos, onde Sarria comezará a descubrir quen chega ás eleccións de maio de 2027 con máis posibilidades de dar o xaque definitivo.