José Manuel Parada, novo presidente do Clúster da Madeira e o Deseño de Galicia
O Clúster da Madeira e o Deseño de Galicia (CMD) inicia unha nova etapa co nomeamento de José Manuel Parada, actual director de Molduras del Noroeste, como presidente da entidade durante os próximos dous anos. Parada toma o relevo de José Manuel Iglesias, que deixa o cargo tras varios anos de dedicación ao clúster e ao conxunto da cadea de valor da madeira en Galicia.
A entidade agradeceu o labor desenvolvido por Iglesias durante o seu mandato, no que destacou pola súa actitude conciliadora e polo seu compromiso coa integración das distintas sensibilidades dun sector amplo e diverso. Ao longo destes anos, defendeu a importancia de construír unha cadea de valor unida, capaz de identificar obxectivos comúns e avanzar de maneira coordinada, por riba dos intereses particulares de cada actividade.
Esta aposta polo diálogo, o consenso e a colaboración contribuíu a consolidar o CMD como un espazo de encontro entre empresas, institucións e outros axentes vinculados ao sector. A entidade quixo recoñecer expresamente esta traxectoria no momento do relevo na presidencia.
José Manuel Parada asume a responsabilidade coa intención de dar continuidade ao traballo realizado e, ao mesmo tempo, abrir unha nova etapa para afrontar os desafíos e as oportunidades da cadea de valor da madeira e do deseño en Galicia.
Entre as súas prioridades figuran a defensa dos intereses das empresas asociadas e o reforzo do papel do clúster como punto de encontro para favorecer a cooperación entre actividades e organizacións que forman parte do ecosistema da madeira e do moble.
O novo presidente tamén aposta por manter unha relación aberta e construtiva coas asociacións e entidades representativas do sector, así como por avanzar en obxectivos compartidos. Ademais, o CMD continuará colaborando coas administracións públicas para trasladar as necesidades das empresas e achegar propostas que contribúan a mellorar a competitividade e a sustentabilidade da cadea de valor.
O nomeamento chega nun momento clave para a entidade, marcado polos retos recollidos no seu Plan Estratéxico CIMA. Entre as liñas prioritarias están o fortalecemento da competitividade empresarial, a transformación dixital e sostible, o impulso da innovación e a cooperación entre compañías, centros de coñecemento e outros axentes do sector.
A construción industrializada con madeira, a economía circular, os novos materiais e o sector contract serán tamén ámbitos de traballo destacados. A estes súmanse a captación e formación de talento, a internacionalización e a participación en proxectos estratéxicos, co obxectivo de crear novas oportunidades de crecemento e aumentar o valor engadido da industria.
25 anos de traxectoria
O cambio na presidencia prodúcese despois de que o CMD celebrase os seus 25 anos de actividade, un período no que traballou pola unidade, a innovación e a transformación do sector. Ao longo deste tempo, a entidade mobilizou máis de 28 millóns de euros de investimento en proxectos, impulsou 78 iniciativas de innovación e 15 proxectos europeos, e desenvolveu 58 programas de formación.
A súa actividade completouse con diversas iniciativas de internacionalización, colaboración e divulgación destinadas a fortalecer o conxunto da cadea de valor.
Parada afronta esta nova etapa co propósito de preservar o legado construído durante este cuarto de século e preparar o clúster e as súas empresas asociadas para os retos futuros. O seu nomeamento representa así unha transición baseada na continuidade, pero tamén a oportunidade de impulsar novas iniciativas a partir da experiencia acumulada e da rede de empresas e entidades que conforman o CMD.
A entidade encara os próximos anos coa vontade de seguir sendo un espazo para escoitar o sector, conectar capacidades e intereses, construír consensos e transformar os desafíos compartidos en iniciativas e proxectos concretos.