Luz Casal e Echo and The Bunnymen encabezan o cartel das Festas de María Pita 2026 na Coruña
As Festas de María Pita 2026 xa teñen programación oficial para os meses de xullo e agosto. O Concello da Coruña detallou as principais citas dun calendario festivo que combinará grandes concertos na praza pública, festivais consolidados e actividades repartidas polos diferentes distritos da cidade.
O escenario principal da Praza de María Pita concentrará o groso das actuacións gratuítas a partir do 1 de agosto, xornada na que a actriz Lucía Veiga dará o pregón e celebrarase o concerto de Luz Casal. Nos días posteriores sucederanse os directos de Mercedes Peón, La Delio Valdez, a xira Los40 Summer Live, Ginebras, The Rapants, a orquestra Los Satélites, Fillas de Cassandra e Israel Fernández.
O programa tamén recolle o regreso do Festival Noroeste Estrella Galicia, fixado do 5 ao 8 de agosto, que conta coa banda británica Echo & The Bunnymen como cabeza de cartel canda formacións como Sés ou Bala. A este evento súmanse citas tradicionais do verán coruñés como o Certame de Habaneras, a Batalla Naval do 14 de agosto, a Semana Clásica, o Festival de Folclore, Viñetas desde o Atlántico e o certame de artes escénicas Manicómicos, que abrirá a actividade a mediados de xullo.
O peche dos festexos trasladarase ao parque de Santa Margarida, onde se celebrarán os concertos de Judeline e Valeria Castro previos á tradicional Romaría, que se desenvolverá entre o 28 e o 30 de agosto. A imaxe gráfica que ilustra as festas deste ano foi deseñada polo artista local Correa Corredoira.